बहुप्रतिभाशाली कलाकार भिमसेन रिसाल

आपा: धइथें नेवा: संकिपाय् खनेदयाच्वनीगु ख्वा: ख: भिमसेन रिसाल । वय्क:या थ:गु हे धापुकथं नेवा: संकिपाय् म्हिते दया: थ:यात तसकं हे लसता व:गु खनेदु । विशेष याना: निर्देशक सुरेन्द्र तुलाधरया दक्व धइथें संकिपाय् म्हितूम्ह भिमसेन रिसालभाजुं सुुरेन्द्र तुलाधरया ‘जिपिं बदमाश मखु’ छगू धा:सा म्हिते मखंगु जुयाच्वन । ‘उगु इलय् शायद जित: ल्व:गु रोल मदु जुइ । अथे जुया: म्हिते मखन ।’ धका: थ:गु खँ न्ह्य:ने त:म्ह भिमसेन रिसाल थन येँया थँहिति त्वालय् जन्म जूम्ह ख: । अनंलि थनया त्य:र त्वालय् च्वंगु त्यौड निम्न माध्यमिक विद्यालय नांयागु ब्वनेकुथी आख: ब्वन । वहे ब्वनेकुथी एस.एल.सी. नं बिल । तर पास मजू । एस.एल.सी. पास मजूसां वय्क: भाजु नेवा: भासाय् पास जुल । छम्ह कलाकारया रुपय् पास जुल ।
थँहितिइ जन्म जुल । त्य:रय् स्कूल वन । नेवा:तय् दथुइ ब्वलन । अथेजूबलय् वय्क: भाजु नं नेवा: थें हे जुया वन । नेवा: भाय् फर्रर ल्हाय् सल । अले आ: वया: नेवा: संकिपा ख्य:या छम्ह लोकंह्वा:म्ह कलाकारया रुपय् वय्क:या न्हाय् धस्वात । छाति तफात । नेवा: संकिपाया हुनिं थ:यात आपा:सिनं म्हसिउगुलिं भिमसेनया छाति धात्थें हे महाभारतकालीन भिंद्य:या थें हे तुं तफा: जुल धका: वय्क: थ:म्हेसिनं हे कनादिल । थौंकन्हय् वय्क: ‘फय्गं’ सिरियलय् व्यस्त । उके छम्ह कलाकार जक जुया: मखसे छम्ह ग्वाहालिमि जुया: नं निर्देशक सुरेश स्थापितयात ग्वाहालि यानावयाच्वंगु दु । सच्छिब्वसिबें अप्व: ब्व क्यनेज्या जुइधुंकूगु ‘फय्गं’ सिरियल स्वकुमि दथुइ लोकंह्वानाच्वंगु दु । तर ‘फय्गं’यात स्पोन्सर याइपिं व विज्ञापन बिइपिं उलि मदया थाकुया च्वंगु दु ।
भिमसेन रिसालं नेवा: संकिपा ख्यलय् दिपा मदिक्क पला: न्ह्याका वयाच्वंगु दु । वय्क:भाजुया न्हापांगु पला: नं ‘हाकु स्वाहाने’ नांयागु नेवा: प्याखं (नाटक)पाखें हे न्ह्या:गु ख: । स्व. गिरिजाप्रसाद जोशीं च्वयात:गु थ्व छगू तसकं बांला:गु प्याखं ख: । थ्व प्याखंया निर्देशन बद्री नेपालं या:गु ख: । हाकु स्वाहानेनिसें नेवा: कलाकारिताया स्वाहाने त्वाथ: गयेगु शुरु या:म्ह भिमसेन रिसालं नेवा: संकिपा व नेवा: सिरियलय् दिपा मदिक्क ज्या याना वयाच्वंगु दु । उकिया नापनापं खस नेपाली भाय्या फिल्म व सिरियलय् नं ज्या यानावयाच्वंगु दु । वय्कलं म्हितूगु छगू कलिउड फिल्म ‘आई ह्याभ रिजन टु डाई’ आ: याकनं हे रिलिज जुइत्यंगु दु । थ्व फिल्मय् भिमसेन रिसालया तिपु जुया: सरस्वती मानन्धर खनेदयेक वयेत्यंगु दु ।
थथे खस नेपाली भाय् व नेवा: भाय् निगुलिं ख्यलय् थ:गु कलाकारिता न्ह्यब्वया वयाच्वंम्ह भिमसेन रिसालं, ‘नेवा: संकिपाय् थ:म्हेसिनं थ्व भाय् प्रतिया मतिनां याना ज्या याना च्वनागु ख: । अले जित: आपासिनं नेवा: संकिपाया कलाकार धका: हे म्हसिउ ।” धका: धाल सा खस नेपाली फिल्मय् ज्या यानागुया लब: धइगु आर्थिक जक ख: धका: नं कन । खस नेपाली फिल्मपाखे ज्या यायेबलय् द्व:बद्व: दां ज्याला कथं वइ । नेवा: फिल्मय् अथे जुइमफुनि । जुइफुगु जूसा बांला: धइगु बिचा: भिमसेन रिसालयागु बिचा: ख: । खय्तला थ:म्हेसियागु छेँ थ:गु कारीगरीं हे चले जू । वय्क:या कारिगरी धइगु तिसा ज्वलंया ज्या ख: । उकें फिल्म म्हिता: धेबा हे कमे याये धइगु मदु । तर अथेजूसां थ:गु प्रतिभा व कला ब्वयेबलय् उकिया आर्थिक लब: नं काये द:सा जक थ्व ख्य:या थपु जुइ धइगु खँ भिमसेन रिसालं तल ।
रिसाल थरया ल्याखं वय्क: छम्ह गैर नेवा: ख: । तर वय्क:या जहान धा:सा छम्ह नेवा: ख: । अथे जुया: नं वय्क:यात नेवा: भाय् प्रति अप्व: मतिना दुगु जुइमा: । तर छु नं लजगा धइगु भावना व मतिनां जक ता:लाइमखु । उकिं ल्हा: म्हुतु चूलाये फयेमा । प्वा: जायेके दयेमा: । अले जक उगु ख्यलय् नुग: क्वसायेकीपिं अप्वया वइ । अले जक थ्व ख्य:या थपु जुया वइ धइगु बिचा: भिमसेन रिसालया बिचा: ख: ।
भिमसेन रिसालयात थ:गु अभिनय यात्राय् नेपा:या नांजा:म्ह हास्य कलाकार गोपालराज मैनालीलिसे यायेखंगु अभिनय धइगु गबलें ल्व:मंके मफइगु खँ जुयाच्वन । नेपा:या फिल्मख्यलय् चंखेया नामं तसकं लोकंह्वा:म्ह गोपालराज मैनालीलिसे ‘घामछाँया’ नांयागु टेलिफिल्मय् ज्या या:गु ख: ।
भिमसेन रिसालयात आपा:सिनं कमेडी रोलय् जक म्हितकेगु याना वयाच्वंगु दु । तर वय्क:यात धा:सा थीथी बिस्कं कथंया रोल यायेगु इच्छा दु । आ: तक थ:म्हं यानागु रोलय् वय्क:भाजुयात ‘फय्गं’ सिरियलय् बुर्‍हा जुया: म्हिताच्वंगु रोल सा:प हे य:गु जुयाच्वन । छाय्धा:सां व रोल धइगु मनूतय्गु जीवनलिसे तसकं सति हँ ।
वय्क:भाजुयाके दुगु मेगु छगू खुबी धइगु वय्क: क्यारिकेचर कलाय् नं तसकं हे बांला:म्ह प्रतिभा ख: । न्ह्याथेंजा:म्ह झंग: पंछीया स: दुरुस्तय् पिकायेफु । थुकथं स्वयेबलय् वय्क:या अभिनय फिल्ड कमेडी थें खनेदु । तर वय्कलं बिस्कं बिस्कं सवा:या रोल याना वयाच्वनादीगु दु । नेवा: संकिपा व सिरियलपाखे नुग: क्वसा:पिं सकसिया दथुइ वय्क:भाजु लोकंह्वाना वयाच्वंगु दु । अले वय्क:भाजु प्रति भिंचिउता तइपिसं वय्क:यात ‘ख्वताबजि’या मारवाडी साहुया रोलंनिसें कया: राष्ट्रिय अन्तर्राष्ट्रिय रुपं हे बय्बय् जूगु नेवा: शर्ट मूभि “मुद्दा”य् वय्कलं यानादीगु वकिलया रोलतकया माध्यमं थ:थ:गु नुगलय् स्वथनाच्वंगु दु । छम्ह बहुप्रतिभाशाली कलाकारया निंतिं थ्व सिबें त:धंगु लब: मेगु छु जुइ धका: धाइम्ह भिमसेन रिसालया निंतिं स्वकुमिया मतिना हे थ:गु निंतिं त:जिगु धन ख: धइगु खनेदु ।

More Stories Like this