एमाले नेता ओलीयात थप उपचारया नितिं थौं हे बैंकक यंकीगु
एमाले संसदीय दलका नेता केपी शर्मा ओलीयात थप उपचारया नितिं थौं एयर एम्बुलेन्सपाखें थाइल्याण्डया राजधानी बैंकक यंकीगु जूगु दु । थौं न्हिनय् ३:३० ताः इलय् ओलीयात बैंककया बमरुगान अस्पतालय् उपचारया नितिं यंकेत्यंगु खः । वय्कःलिसे निम्ह डाक्टरपिं डा. विजय शाह व डा. राजेश शाक्य नं वनिगु जूगु दु ।
आईतवाः महाराजगञ्जसं च्वंगु टिचिङ्ग अस्पताल भर्ना जुयादीम्ह ओलीयात ‘फंगल्स मेनेन्जाईटिस’ जूगु परिक्षणपाखें सीदुगु खः । ‘फंगल्स मेनेन्जाईटिस’ परिक्षणया नितिं भारत छ्वःगु खः । अनपाखें प्राप्त रिपोर्टकथं वय्कःयात उगु ल्वय् जूगु पुष्टि याःगु खः ।
ओलीया निजी चिकित्सकं ‘फंगल्स मेनेन्जाईटिस’ ल्वय्या उपचार थाईल्याण्डय् वनाः यायेत सुझाब बीवं वय्कः थौं हे उखेपाखे वनेत्यंगु खः । ओली झिंनिन्हु न्ह्यः जक भातरय् उपचार याकाः लिहाँ झायादीगु खः । ओलीयात ज्वर वइगु, वान्ता जुइगुु क्रम मदीवं टिचिङ्ग भर्ना याःगु खः । भारतया न्हू दिल्लीइ निला ताःहाकःगु वासः याकाः ओली बैशाख ६ गते जक नेपाः लिहाँ झाःगु खः ।
