पशुपतियात सभासद् दयेकेगु राप्रपाया तयारी

राष्ट्रिय प्रजातन्त्र पार्टीं संविधानसभाय् मनोनित सभासद्य् वरिष्ठ नेता पशुपतिशमशेर जबरायात छ्वयेगु तयारी याःगु दु । पार्टीयात दुगु छगू कोटाय् जबरायात छ्वयेगु लगभग पक्का जुइधुंकूगु दु । पार्टी पदाधिकारी तहं थुकियात क्वःछिना प्रधानमन्त्री सुशील कोइरालायात जानकारी नापं बीधुंकूगु दु ।

थः काय् सुनिल थापायात मन्त्री दयेकाः कुंखिंकाः च्वंम्ह नायः सूर्यबहादुर थापां जबरायात छ्वयाः पार्टीदुनेया कचवं मत्थर यायेत स्वःगु सीदुगु दु । थापा निकट छम्ह नेतायाकथं जबराया नामय् पार्टीदुने कचवं धाःसा मदु ।
थ्व स्वयाः न्ह्यः समानुपातिक सभासद् व निम्ह मन्त्री ल्ययेगुयात कयाः पार्टीइ कुंखिनेगु ज्या जूगु खः ।