संकिपा ख्य:या छग: थां आर्यम नक:मि

नेपालभाषा संकिपाया इतिहास च्वयेबलय् त्व:फिके मजिउगु छगू संकिपाया नां ‘सुभाय्’ ख: । थ्व संकिपाया च्वमि, निर्देशक व कलाकार ख: – आर्यम नक:मि । ‘सिलु’निसें न्ह्या:गु नेवा: संकिपाया इतिहासय् लिपा ‘राजमति’, चरित्र, चिपनिप, निपा:ख्वा:पा:, न्हिला:न्हिला: हुँ थेंज्या:गु छुं छुं संकिपा पिदन । अनंलिपा ‘चाण्डालिका’ पिदन । तर नेवा: संकिपाया यात्रा उलि सुथांलाक्क न्ह्यायेमफुत । दिपा काल । अज्या:गु इलय् पिदंगु संकिपा ख:, सुभाय् । थ्व संकिपा पिदने धुंका:निसें छगू निगु यायं मेमेगु नं नेवा: संकिपा पिदनेगु क्रम सुरु जुल । उकिं ‘सुभाय्’यात नेवा: संकिपा ख्यलय् पुनर्जागरण ह:गु संकिपा धकातकं धायेगु यानात:गु दु ।
थुकथं नेवा: संकिपा ख्यलय् पुनर्जागरण हयेत ता:ला:म्ह आर्यम नक:मिं सुभाय् धुंका: छसिकथं पपू मदुम्ह झंग:, न्याल्लब्यां नं दयेकल । आ:तकया छगू दर्जनं मल्याक नेवा: संकिपा दयेके धुंकूम्ह आर्यमया छगू टेलिसिरियल ‘डाय्ड–सन’ थौंकन्हय् नेटिभी प्लसय् क्यनावयाच्वंगु दु । थुके नेपा: देय्या नांजा:म्ह हास्य कलाकार राजाराम पौड्यालया नं छगू मूभूमिका दु । तर थ्व सिरियलया मू बाखं धइगु अबु व काय् दथुया स्वापुयात कया: न्ह्यानाच्वंगु दु । थुके आर्यम नक:मि थ: हे अबु जुया: म्हिताच्वंगु दुसा काय् जुया: म्हिताच्वंम्ह सविन शाक्य ख: । सविन शाक्य व आर्यम नक:मि दथुया थ्व पाचिना ‘सुभाय्’निसें हे न्ह्याना वयाच्वंगु ख: । ‘न्याल्लब्यां’ संकिपाय् सबिन शाक्य मिसाया रुपकया: म्हितूगु रोल आ:तक नं स्वकुमितय् दथुइ चर्चाया विषय जुयाच्वं । लिपा ‘सत्य धरोधर्म’ नांयागु संकिपाय् पल्पसा डंगोल मय्जुं मिजंया रुप कया: म्हितूगु खँ नं थनथाय् लाक्क चर्चा यायेबह:जू । अले गुलिसिनं ला ‘सत्य धरोधर्म’यात ‘न्याल्लब्यां’या रिभर्स भर्सनतकं धाल । थुकिया लिस: बिइगु झ्वलय् ‘बाखनय् समानता भ्या: भतिचा हे मदु । छगू संकिपाय् मिजंनं मिसाया रुप धारण याइसा मेगुलिइ मिसां मिजंया रुप धारण याइ । उलि जक हे ज्व:ला । बाखं ला बिस्कं बिस्कं हे ख:’ धका: आर्यम नक:मिं कन ।
आर्यम नक:मि वि.सं. २०४३ सालंनिसें हे कलाकारिता ख्यलय् पला: न्ह्याकूगु ख: । दकलय् न्हापा वय्क: भाजुं छुं छुं खस नेपाली भाय्या नाटकय् अभिनय यात । वय्क: भाजुया अभिनय गुरु धइम्ह मुकुन्द किशोर भट्टराई ख: । निर्देशक भट्टराइया ‘मुटुको काँडा’, ‘फेशन’ व मेमेगु नाटक म्हिता थ:गु यात्रा न्ह्याकूम्ह आर्यमं २०४५ सालय् प्रज्ञा प्रतिष्ठानं याइगु गाइजात्रा महोत्सवय् नं ब्वति काल । प्याखनय् म्हितां जक जीवन हने फइथें मतायेका वय्क:भाजुं थ:गु पला: रेष्टुरां बिजनेसपाखे न्ह्याकल । येँया थँबहिलय् कफि कियक्स नांयागु छगू रेष्टुरांय् लाये तल । रेष्टुरां चले जुल । अले छगू पला: अझ न्ह्याका: गेष्ट हाउस छगु नं चायेकल । वय्क:भाजुं चायेकूगु गेष्ट हाउसया नां ‘भ्यालेन्टाइन्स गेष्ट हाउस’ ख: । उगु इलय्तक भ्यालेन्टाइन्सया अर्थ छु धका: तकं बांलाक मसिउनि धका: आर्यमं कन । झिंप्यदँतक थुके हे लगे जुयाच्वन ।
थुकथं बनेज्याय् तक्यंबलय् झिंप्यदँया बनवासय् वंम्ह आर्यम दुने सुलाच्वंगु कलाकारिताया झंग: उगु इलय् वालावाला सना हल गुगु इलय् नेपाल टेलिभिजनय् ‘तं बैंक’ नांयागु टेलिसिरियल पिदन । थ: दुने वालावाला मिना वयाच्वंगु कलाकारिताया इच्छा पूवंकेत आर्यमं छुं छुं नाटकत यायेगु यात । येँया भुइज:सिइ वय्क:या भिंचापिं दु । अन गामय् क्यनेत नेवा: प्याखंत च्वल । बाज्याया ग्वाय्, मिखा दुम्ह कां, हाकु मैंचा थेंज्या:गु प्याखंत क्यन । थ्वहे प्याखंत लिपा संकिपाया रुप का:गु ख: । उकी मध्ये नं मिखा दुम्ह कां आर्यमं दकलय् न्हापांखुसी दयेकल । उकी श्यामसुन्दर शिल्पकार, अर्णेश्वरी शिल्पकार व थ:म्हेसिनं हे मेनरोल म्हितल । संकिपा ला तयार जुल । तर क्यने थाय् गनं मदु । इमेज च्यानलय् क्यनेगु खँ ला जुल । तर स्पोन्सर माले मफुबलय् ग्वसा: ता:लाये मफुत । आर्यम अय्सां हारे मचा: । ‘सुभाय्’ नांयागु मेगु छगू नं सिरियल दयेकल । तर दु:खया खँ छु जुल धा:सा थ्व सिरियल दयेका: तयार जुइ मला:नि कपि जुया: आपा:सिया छेँखाय् थ्यन । अले सिरियलया रुपय् पित हयेगु बिचा: त्व:ता: छगू निगू च्यारिटी शो याना क्यन । नेवा: संकिपाया इतिहासय् दकलय् अप्व: छेँखाय् थ्यंगु संकिपा सायद ‘सुभाय्’ हे जुइमा: । आपालं आपा: छेँखाय् थ्यंसां पाइरेसी जुया:, कपि याना थ्यंकूगुलिं आर्यमया टिमयात आर्थिक लब: भ्या:भतिचा हे मजू । तर आपालं आपा: स्वकुमितय् दथुइ ‘सुभाय्’या कलाकारतय्गु छगू हुइमफुगु छाप धा:सा च्वन । थुकिं याना: उकिया कलाकारत लोकंह्वात । अले उमित मेमेगु संकिपा दयेकेत अ:पुल । ‘सुभाय्’या अनुभवं इमित खारे यात ।
कलाकारिता ख्यलय् दकलय् न्हापां पला: न्ह्याकाच्वंगु इलय् आपालं खस नेपाली भाय्या नाटकय् ज्या या:म्ह आर्यमं लिपा वना ‘पिरेम पर्‍या छ’ टेलिफिल्मया लेखन, निर्देशन यात सा नांजा:म्ह हास्यकलाकार नारायण त्रिपाठीया ‘कुखुरी कां’ म्हितल । थ्व वि.सं. २०५८ पाखेया खँ ख: । खस नेपाली भाषाय् नं थ:गु पला: क्वातुकेत ता:ला:म्ह आर्यमं लिपा नेपा:या नांजा:म्ह कमेडीकिंग सन्तोष पन्तया ‘हिजो आजका कुरा’या च्वमि व सह–निर्देशहक जुया: नं ज्या याये धुंकल ।
खस नेपाली भाय्या संकिपा ख्यलय् थुकथं थ:गु म्हसिका दयेकेत ता:ला:म्ह आर्यमया नुग: दुने मांभाय् प्रतिया मतिना दासिवयातुं च्वन । अले वय्क:भाजुं ‘मिखा दुम्ह कां’ दयेकल । तर पिदने मफुत । लिपा वना वहे बाखंयात भतिचा न्हूधा: याना: न्हूगु हे संकिपा दयेकल । न्हूगु संकिपाय् राजेन्द्रमान शाक्य, कृष्णभक्त महर्जन, अष्टमाया, सुनिता ठाकुर व नरोत्तम मानन्धरपिन्त म्हितकल । छगू धुंका: मेगु स्यल्ला:गु नेवा: संकिपा दयेका: नेवा: संकिपाया धुकू त:मि यायेत ता:ला:म्ह आर्यमं दयेकूगु ‘भिंतुना’ ला निक्व:गु नेपाल अन्तर्राष्ट्रिय आदिवासी फिल्म फेस्टिभलय् ‘क्रिटिक्स अवार्ड’तकं त्याकेत ता:लात । वहे इलय् ‘भिंतुना’ संकिपां पोखराय् जूगु आदिवासी फिल्म फेस्टिभलय् नं ‘क्रिटिक्स च्वइ अवार्ड’ हे त्याकल । तर आर्यम नक:मि व सुनिता राजभण्डारी जाना: दयेकूगु ‘माया’ धा:सा सिरपाया धेंधेंबल्लाखय् लिउने लात । थ्व विषय न्ववासें आर्यमं धाल, ‘माया नं छगू तसकं बांला:गु संकिपा: ख: । जिमिसं तसकं मिहेनत नं यानागु ख: । तर उकी जिमिसं बाखं न्ह्याकेत न्हूगु शैली नाला कया । परम्परागत शैली दुबिना च्वंपिसं व न्हूगु सवा मययेकल ।’
मचाबलेनिसें हे कलाकारिता ख्य:पाखे नुग: क्वसायेका व:म्ह आर्यम भारतया पुनाय् छगू फिल्म इन्ष्टिच्यूट दु धका: न्यनात:गु जुयाच्वन । तर अन थ्यंक वने मफु । अले थन हे हिमालयन कल्चर धा:थाय् जूसां एक्टिङ्गया ट्ेरनिङ काल । आपालं खस नेपाली नाटकत व टेलिफिल्म म्हितल । अनंलि थ:गु मांभाय् प्रतिया मतिना न्ह्यब्वया क्यन । नेवा: संकिपा ख्य:या छग: धिसिला:गु थां जुया क्यन । थौंकन्हय् नेटिभी प्लसं क्यनावयाच्वंगु सिरियल ‘डाय्ड–सन’ व बेलायतय् च्वनाच्वंम्ह नेवा: संकिपामि मनिष श्रेष्ठं दयेकूगु ‘तुयूमति’ संकिपा तयार यायेगु झ्वलय् व्यस्त जुयाच्वंम्ह आर्यम नक:मि न्हापा नाटकया रुपय् क्यगु बाज्याया ग्वाय् व मिखा दुम्ह कां संकिपाया रपय् दयेकू थें हे तुं ‘हाकु मैंचा’ नं संकिपाया रुपय् दयेकेगु ग्वसा: ग्वयाच्वंगु दु ।

More Stories Like this