नेमकिपाया छ्याञ्जेय् प्रजापति व दाँभरिइ शाक्य ल्यल
नेपाल मजदुर किसान पार्टीया केन्द्रीय समितिया न्हापांगु बैठकं पार्टीया छ्याञ्जेय् सुनिल प्रजापति व दाँभरिइ चैत्यराज शाक्ययात ल्यःगु दु ।
पार्टी नायः नारायणमान बिजुक्छेया नायःसुइ च्वंगु बैठकं पार्टीया थीथी विभाग नापं नीस्वंगु दु । बैठकं पार्टी संगठन विभाग प्रमुखया भालाः पार्टी छ्याञ्जे सुनिल प्रजापति व विदेश विभागया भालाः मू दुजः प्रेम सुवालयात ल्यःगु नेता सुवालं जानकारी बियादीगु खः । आर्थिक विभागया प्रमुखय् दाँभरि चैत्यराज शाक्ययात ल्यःगु खः ।
बैठकं नेपाल क्रान्तिकारी बिद्यार्थी संघया नायः रबिन्द्र ज्याख्यःयात पार्टीया मू दुजः दयेकूगु दु । नेमकिपाया खुक्वःगु महाधिवेशन चैत २१ गतेनिसें २४ गतेतक्क जूगु खः । महाधिबेशनं नारायणमान बिजुक्छेयात सर्बसम्मतिं नायःसं ल्यःगु खः । बिजुक्छे २०३१ साल माघ १० गते पार्टी पलिस्था जूसांनिसें थौंतक्क नायः जुयाः वयाच्वनादीगु खः ।
