सगरमाथा आरोही रामकृष्णयात ग्वाहालि यायेत पुचः निस्वनः
सगरमाथा आरोही रामकृष्ण श्रेष्ठं चैत्र मसान्तया दुने स्वक्वःगु खुसी सगरमाथाया आरोहण यानादीगु जूगु दु । उगु आरोहण ताःलाकेत नेपाल चेम्बर अफ कमर्शया पुलाम्ह नायः सुरेन्द्रवीर मालाकारया संयोजकत्वय् छगू ग्वाहालि पुचः निस्वंगु दु ।
ग्वाहालि पुचलय् नेवाः जागरण मञ्चया नायः सुजीव बज्राचार्य छ्याँञ्जे कथं च्वनादीगु दुसाः दुजलय् येँ महानगरपालिया दलीय संयन्त्रया दुजःत विद्यासुन्दर शाक्य, उमेश स्थापित, भगवान शाक्य नापं नेपाल पर्वतारोहण संघया छ्याँञ्जे राजेन्द्रमान श्रेष्ठ, सत्यनारायण डंगोल, नविन मानन्धर, ज्ञानेन्द्ररत्न बज्राचार्य, धनबहादुर महर्जन, ईश्वरमान डंगोल, ल्हाक्पा शेर्पा, पवित्र बज्राचार्य, मचाराजा महर्जन, सर्वज्ञ बज्राचार्य, यज्ञरत्न तुलाधर, सूर्यबहादुर श्रेष्ठ लगायत च्वनादीगु दु ।
अथेहे सल्लाहकारय् सभासद्त रामवीर मानन्धर, भीमसेनदास प्रधान, राज्यलक्ष्मी श्रेष्ठ, प्रभा बज्राचार्य, लक्ष्मण राजवंशी, पुुलापिं मन्त्रीत पद्मरत्न तुलाधर, हिसिला यमि, पुलापिं राज्यमन्त्रीत कृष्णगोपाल श्रेष्ठ, तीर्थराम डंगोल, उद्योगपति लक्ष्मीदास मानन्धर, जीवनराम श्रेष्ठ, नरेशवीर शाक्य व प्रचण्डमान श्रेष्ठ च्वनादीगु दु ।
ग्वाहालि पुचलं याकन हे आर्थिक ग्वाहालि संकलन यायेत थीथी ज्याझ्वःया ग्वासाःग्वयेगु व थ्वहे वइगु बैशाख ३ गते सगरमाथा आरोहण सफलताया कामना यासें जनस्तरं भिंतुना ज्याझ्वः याइगु जूगु दु ।
संयोजक सुरेन्द्रवीर मालाकारं सगरमाथा आरोही रामकृष्ण श्रेष्ठयात फुक्क ख्यलं ग्वाहालि यायेत अपील यानादिसें विश्व वातावरण बचे यायेत सगरमाथा आरोहण याइगु जूगुलिं थ्व नेपाःया निंतिं जक मखसें विश्वया निंतिं हे महत्वपूर्ण सन्देश प्रवाह जुइगु बिचाः प्वंकादिल ।
