‘राज्य पुनर्संरचनाया मुद्दा धरापय् लानाच्वन’
पहिचान पक्षधर शक्तित छप्पँ जुइ मफुगुलिं पहिचान सहितया संघीयता व संघीयता सहितया संविधान जारी जुइगु ज्या धारापय् लानाच्वंगु बिचाः थीथी राजनीतिक दलया नेताताय्सं प्वंकूगु दु ।
नेवाः स्वयात्त राज्य मंकाः संघर्ष समितिं शुक्रवाः येँया इतुंबहालय् याःगु ‘आःया परिस्थितिइ पहिचानया मुद्दा व आःया लँपु’ विषयक सभाया न्ववापिं वक्तापिंसं राज्य पुनर्संरचनाया मुद्दा धरपाय् लाःगुलिं आः पहिचान पक्षधर छप्पँ जुयाः सघर्ष मयायेगु खःसा देय् दुर्घटनाय् लाइगु ख्याच्वः तकं बिउगु दु ।
एकीकृत नेकपा माओवादीया नायः माओवादी पुष्पकमल दाहाल ‘प्रचण्डं’ न्हापा हे परिवर्तनकारी शक्तित छप्पँ जुयाः न्ह्याः मवनाः गल्ती जूगु धयादिसें आःया अवस्था अज्याःगु गल्तीयात भिंकाः एकताबद्ध जुयाः न्ह्याः वनेमफुसा देय् दुर्घटनाय् लाइगु धयादिल ।
‘पहिचान पक्षधरत छप्पँ जुयाः संघर्ष यायेमाःगु थासय् झी विभाजित जुल’, सभाय् प्रचण्डं धयादिल, ‘आः परिवर्तनयात संस्थागत यायेत फुपिंसं पार्टी एकता, मफुपिसं मोर्चा दयेकाः संघर्ष यायेमाः ।’
नेकपा–माओवादीया नायः मोहन वैद्य ‘किरणं’ उत्पीडित जातीय पहिचान स्थिापित यायेत संघीयता पक्षधर जक मखु फुक्कं उत्पीडि पक्षत छप्पँ जुइमाःगु बिचाः प्वंकादिल । ‘मिसा, दलित, मधेशी, मुस्लितत दथुइ एक्यबद्धता जुइमाः, यकाचां जक संघर्ष यानाः सम्भव मदु ।’ वैद्यं धयादिल ।
मधेशी जनअधिकार फोरमया नायः उपेन्द्र यादवं आःया अवस्थाय् पहिचान सहितया संघीयता दुगु संविधान वइ धकाः थःत विश्वास मदइगु धयादिल । ‘संविधान जारी हे जूसां उत्पीडित जातियात संबोधन जुइगु कथं जुइमखु ।’, यादवं धयादिल ।
अथेहे संघीय समाजवादी नेपालया नायः अशोक राईं पहिचान पक्षधर शक्तितय्सं सदन, संविधानसभा व सतकं संघर्ष यायेमाःगु धयादिसें अथे यायेफुसाः पहिचान विरोधी संविधान जारी जुइमफइगु न्ह्यथनादिल । वय्कलं धयादिल, ‘समान राय व समान बिचाः दुपिं राजनीतिक शक्ति नापं मिले जुयाः संघर्ष यायेमाः ।’
नेपाः राष्ट्रिय पार्टीया नायः डा. केशवमान शाक्यं थःगु पार्टीया अवधारणा मेमेगू स्वयां बिस्कं जूगु खँ धयादिसें चीन व भारत स्वाइगु कथं न्यागू प्रान्त दयेमाःगु व स्वंगूगु तहलय् जक जातिय अधिकार प्राप्त राज्य दयेकेमाःगु बिचाः प्वंकादिल ।
नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं निक्वःगु संविधानसभा लिपाः न्ह्याःगु हे कथंया समीकरण वःसां अन्तरिम संविधान २०६३पाखें मधेशी, जनजाति व उत्पीडि समुदायया स्वयत्तताया चहानायात पूवंकेगु कथं राज्यया पुनर्संरचनाय यायेगु धयकाः न्ह्यथनातःगुलिं उगु संवैधानिक धारापाखें सरकार व संविधानसभा लिचिलेमज्यूगु धयादिल ।
संघर्ष समितिया वर्तमान नायः मोहन बहादुर महर्जनया सभापतित्वय् न्ह्याःगु सभाय् सुभाय् न्वचु ज्यापु महागुथीया नायः राजभाइ जकःमिं बियादीगु खः ।
