ज्यापु महागुथिया अवधारणा

ज्यापु जातिया राष्ट्रिय संगठन ज्यापु महागुथि ने.सं १११३ स नेपा:या आदिवासी झी ज्यापु जाति धैगु स: थ्वयेका: त:जिक धिमय् ब्वज्या याना: सार्वजनिक जुयागु ख: । थौं तकया दुने स्वनिग:, स्वनिगलं पिने तिस्तुंग, हेटौडा, चितवन व पोखरा तक महागुथिया संगठन विस्तार ज्वी धुंकूगु दु । नीगू वसन्तपार यानागु झ्वलय् ज्यापु महागुथिं कं नं न्हुइ धुन, स्वां नं छुइ धुन । सा: कुबिया: लाय्कूया च्यूता: अर्थात ज्यापु धैपिं बुँज्यामिजक ख: राजनीतिया खँ ल्हाये मज्यू धैगु कुसंस्कारयात हांनिसें लिना: सा: कुबीम्ह ज्यापुं देय् नंं कुबीफु धका: घोषणा याये धुनागु दु । ज्यापु जाति संस्कृतिया पिवा: जक मखु देय्या थुवा: नं ख: धैगु भावना ब्वलंके धुनागु दु । ज्यापु महागुथिं तत:धंगु ज्या याये मफुनिसां सामाजिक उत्पीडन व सामन्ति शाषकतय्गु दमन व शोषणया कारणं अपहेलित यानात:गु ज्यापु खँग्व:यात सकारात्मक रुपं हिला: प्रत्येक ज्यापुया नुगलय् जि ज्यापु धैगु गौरव भावना थनेगु ज्या यानागु दु । ज्यापु महागुथि छगू नितान्त सामाजिक जातीय संगठन ख: । ज्यापु जाति नेपा: देय् निर्माण या:पिं आदिवासी जातिया हैसियतं थन घोषणा यानाच्वना कि ज्यापु महागुथिं गुगुंनं राजनैतिक पार्टीया ध्वाँय् ज्वनीमखु, गुगुं नं राजनैतिक पार्टीया ल्यूल्यू वनी मखु ।
निदँत्या न्ह्य: तोखाय् जूगु निक्व:गु ज्यापु राष्ट्रिय महाधिवेशनं ज्यापु महागुथिया विधान हिलावंगु देय्या परिस्थितियात ल्वयेक संघीय स्वरुपकथं भिंकेगु क्व:ज्यूगु ख: । उलिजक मखु नेवा: स्वायत्त राज्य ज्यापु महागुथिया मू्आज्जु यायेगु क्व:ज्यूगु ख: । थ्वहे भावनाकथं विशेष विधान महाधिवेशनं विधान पारित याना: पहिचानया संविधान ज्यापु जातिया अभियान धैगु राष्ट्रिय नारा थ्वयेका: स्वक्व:गु त:मुँज्याया उलेज्या थन यानाच्वना । थौं बाजंया सलं, ज्यापु जातिया नुगलं धयाच्वना कि गबलेतक ज्यापु जाति उत्पीडनं मुक्त ज्वी मखु, गबलेतक पहिचानया संविधान निर्माण ज्वीमखु उबलेतक ज्यापु जाति सुंकच्वनी मखु । ज्यापु पुर्खां नेपा: देय् निर्माण यायेया निंति थ:पिनिगु सम्पूर्ण जीवन ल:ल्हा:गु दु । उकिं ज्यापु पुर्खायात लुमंका:, ज्ञात अज्ञात शहीदतय्त लुमंका: थ्व ऐतिहासिक उलेज्याय् ज्यापु महागुथिया थ्व आधिकारिक अवधारणा मन्तब्य न्ह्यब्वयाच्वना ।
१) राष्ट्रया खँय् :
नेपा: सकल जातिया मंका: देय् ख: । तर सदिऔंनिसेंया एकात्मक सामन्ति शासनया कारणं देय् लिउने ला:गु ख: । उलिजक मखु जनयुद्ध व जनआन्दोलन धुंका:या राज्य सत्तां देय् व जनताया निंतिं लुधंक ज्या या:गु मदुनि । खालि सत्ताया कुर्सिया निंतिं राजनीतिक पार्टीत न्ह्या: वनाच्वंगु दु । राजनैतिक पार्टीत थ:थ: ल्वाना: देय् वर्वाद जुइगु अवस्थाय् थ्यंकाच्वंगु दु । उकिं प्रत्येक राजनैतिक पार्टीतय्त जिमिसं इनाप यानाच्वना कि थौं ल्वाना: मखु जाना: देय् निर्माण यायेमा:गु दु । पार्टी व व्यक्तिगत स्वार्थयात त्व:ता: न्हूगु नेपा: निर्माण याना: शान्तिमय वुद्धभूमि नेपा: निर्माण यायेमा:गु दु ।
२) सम्विधानया खँय् :
झीगु मांभाय् न्हियान्हिथं न्हनावनाच्वंगु दु, झीगु संस्कृति न्हियान्हिथं तना वनाच्वंगु दु, देय् निर्माण या:पिं भूमिपुत्र आदिवासीत थ:थ:गु भुमिं विस्थापित ज्वीमा:गु अवस्था ब्वलनाच्वंगु दु । उकिं ज्यापु महागुथिं धइच्वना कि जिमिगु पुर्खाया पहिचान जिमित मा:गु दु, नेवा: स्वायत्त राज्य दुथ्या:गु, मां भासं आख: ब्वने दइगु व सरकारी ज्याखँय् छ्यलेगु अधिकार दुगु, धर्मनिरपेक्ष राज्य सुनिश्चित जूगु संविधान मा:गु दु । थ्व अधिकार विनाया संविधान ज्यापु जातियात मान्य ज्वीमखु ।
३) नेवा:या खँय् :
ज्यापु धैपिं नेवा: ख:, नेपा:मि नं ख: । गबलेतक सकल नेवा: जातियाके झी नेवा: धैगु भावना ब्वलनी मखु उबले तक नेवा: जातिया उत्थान ज्वी मखु । उकिं थौंया त:मुँज्याय् स: थ्वयेकाच्वना कि ज्यापु जातिं नेवा: उत्थानया निंति ज्या याइ । ज्यापु जातिं आ: छग: पवित्र नेवा: देय्ग: दनी, व नेवा: देगलय् समानरुपं सकल नेवा:त च्वनी । नेवा: दुनेया थथ्या:क्वथ्या: व थजा:क्वजा:या भावना हुया समतामूलक नेवा: समाजया निर्माण यायेगु ज्याय् ज्यापु महागुथि न्ह्यचिली ।
४) बाजंया खँय् :
ज्यापु बाजं नेपा:या राष्ट्रिय बाजं ख: । थ्व बाजनं राष्ट्रिय संस्कृति, राष्ट्रिय पर्व म्वाका तयेगु ज्याय् त:धंगु भूमिका म्हिताच्वंगु दु । उकिं सम्माननीय प्रधानमन्त्रीजुयात इनाप यानाच्वना कि परम्परागत बाजं खल:यात सरकारं राष्ट्रिय मान्यता बीमा:, गुरु, नाय:, कजिपिंत सांस्कृतिक भत्ता बीमा: । बाजंखल:यात राज्यं नियमित बजेटया ब्यवस्था यायेमा: ।
५) ज्यापु कल्याणकारी कोष :
ज्यापु जाति संस्कृतिया रक्षक जक मखु कृषि ख्य:या विशेषज्ञ नं ख: । ज्यापु जातिया परम्परागत पेशा व ज्याभलं थ्व देय् निर्माण या:गु ख: । ज्यापु महागुथिं ज्यापु संस्कृति, ज्यापु कृषि पद्धति, परम्परागत सीपया विकास व ज्यापु जातिबारे अध्ययन व अनुसन्धान यायेगु ता: तया: ज्यापु कल्याणकारी कोष स्वनेगु ज्या ज्वी धुंकूगु दु । थ्व कोषया निंतिं सरकारं खनेदयेक आर्थिक अनुदान यानादीया निंति विशेष इनाप यानाच्वना ।
६) ज्यापु राष्ट्रिय संग्रहालय :
ज्यापु जातिया जीवन पद्धति दुथ्या:गु छगू ज्यापु राष्ट्रिय संग्रहालय स्थापना यायेगु ज्यापु महागुथिया ग्वसा: दु । थुकीया निंतिं सरकारपाखें अनुदानया नापनापं येँदेसय् गनं च्वंगु गुथिया वा सार्वजनिक जग्गा ज्यापु महागुथियात ल:ल्हानादीत सम्माननीय प्रधानमन्त्रीजुयात इनाप यानाच्वना ।
७) लिखँ :
मूलरुपं थ्व अवधारणाय् जिमिसं राष्ट्र व सम्विधानया खँय् स: थ्वयेकागु जुल । “पहिचानया सम्विधान, ज्यापु जातिया अभियान” धैगु नाराया भावना कथं, नेवा: स्वायत्त राज्य दुथ्या:गु सम्विधान निर्माण यायेमा: । थ्व ज्यापु जातिया मंका: स: ख: । यदि पहिचानया सम्विधान क्व:छिनात:कथं दच्छिया दुने मबिल धा:सा ज्यापु महागुथिं सांस्कृतिक वहिस्कार यायेगु निंतिं पला: ल्ह्वनेगु घोषणा यानाच्वना । हानंछक: लिसा कया: धाये सा: कूबीम्ह ज्यापुं देय् नं कुबीफु । सुभाय् ।
(ज्यापु महागुथिया स्वक्व:गु राष्ट्रिय त:मुँज्याय् महागुथिया संगठन कव:या कजि राजभाइ जक:मिपाखें न्ह्यब्व:गु व प्रधानमन्त्री सुशील कोइरालायात ल:ल्हा:गु अवधारणा पौ गथे ख: अथेहे थन न्ह्यब्वयागु ख: । – सं.)

More Stories Like this