नेवाः जागरण मञ्चं खुक्वःगु बुदिं हन
नेवाः जागरण मञ्चं म्हिगः थःगु खुक्वःगु बुदिं हंगु दु । नेवाः हक हित व संरक्षण यायेगु निंतिं नीस्वंगु मञ्चया उगु खुक्वःगु बुदिं औपचारिक रुपं चिल्लागाः सप्तमी खुनु मञ्चया सक्रिय कार्यकर्तापिनि दथुइ जक हंगु खः ।
खुक्वःगु बुदिंया लसताय् मञ्चया नायः सुजीव बज्राचार्यं खुदँ क्यंगु लसताय् सकसितं सुभाय् देछासें सार्वजनिक रुपं हना ज्याझ्वः याकनं यायेगु जानकारी बियादीगु खः । लिसें वय्कलं दच्छियंकं याःगु थीथी ज्याया प्रगति विवरण दुजःपिनि दथुइ न्ह्यब्वयादीगु खः ।
खुदँ बुदिंया लसताय् मञ्चया सक्रिय दुजःपिन्त वइगु न्हि मञ्चं प्रशिक्षण ज्याझ्वः निरन्तररुपं यायेगु व नेवाः प्रदेश प्राप्तिया आन्दोलनया निंतिं जागरण हयेगु आज्जु तयागु खँ कनादीगु खः । अथेहे न्वकु अमृत ताम्राकारं जागरण मञ्चं नेवाःतय्गु थीथी विषययात कयाः निरन्तररुपं ज्या याना वयाच्वनागु खँ तयादीगु खः ।
लसकुस न्वचु तयादिसें मञ्चया मूछ्याञ्जे विजयकृष्ण श्रेष्ठं भाषा संस्कृतिया लिसेलिसें अधिकारया निंतिं न्ह्यायेमाःगु जूगुलिं हे नेवाः जागरण मञ्च पलिस्था जूगु बिचाः प्वंकादीगु खः ।
