राजभाइ जकःमि ज्यापु महागुथिया न्हूम्ह नायः
ज्यापु महागुथिया स्वक्वःगु राष्ट्रिय तःमुँज्या ने.सं. ११३४ चिल्लागाः सप्तमी (चैत्र ९ गते) कुन्हु न्हूगु कार्यसमिति चयन यासें क्वचाःगु दु ।
थुगु तःमुँज्यापाखें नायः मण्डलया नायलय् राजभाइ जकःमि, केन्द्रीय सचिवालयया मूछ्याञ्जेय् न्हुछेकाजी महर्जन, दांभरिं सरिता महर्जन व छ्याञ्जेय् कथहं गिरिधर डंगोल, नारायणकृष्ण महर्जन, सरिता महर्जन व राकेश महर्जनपिं निर्वाचित जुयादीगु दु । दांभरिं व छ्याञ्जे पदय् सर्वसहमति जूगु खःसा नायःमण्डलया नायः व मूछ्याञ्जेया निंतिं निर्वाचन जूगु खः ।
आइतवाः जूगु बन्दसत्रया प्रतिवेदन सत्रय् विधानया विषयलय् छुं ई विवाद ब्वलंगु खः । तःमुँज्याय् झायादीपिं दुजःपिसं थःपिसं पुस ६ गते पारित यानागु विधानयात ध्याक्वय् तयाः न्हूकथं विधान पिहां वःगु धासें विरोध याःगु खः । सभां उगु हे विधानय् ६ गते जूगु निर्णयकथं भिंकाः पारित यायेगु ज्या याःगु खःसा उगु हे विधानकथं तःमुँज्या जूगु खः ।
शनिवाः प्रधानमन्त्री सुशील कोइरालाया मूपाहाँसुइ उलेज्या जूगु स्वक्वःगु राष्ट्रिय तःमुँज्याय् ज्यापु महागुथिपाखें संगठन कवःया कजि राजभाइ जकःमिं ज्यापु महागुथिया अवधारणा न्ह्यब्वयादीगु खः ।
