न्हापांम्ह नेवाः सगरमाथा आरोही श्रेष्ठया निंतिं ग्वाहालि समिति
न्हापांम्ह नेवाः सगरमाथा आरोही रामकृष्ण श्रेष्ठं स्वक्वःगु सगरमाथा आरोहण थ्वहे वइगु चैत्र अन्तिमपाखे याइगु जूगुलिं वय्कःयात आर्थिक, भौतिक, प्रचारप्रसार सकतां कथंया ग्वाहालि यायेगु निंतिं न्हापांम्ह नेवाः सगरमाथा आरोही रामकृष्ण श्रेष्ठया स्वक्वःगु आरोहण सहयोग समिति नीस्वंगु दु ।
नेवाः जागरण मञ्चं आइतवाः छगू भेला यासें उगु समिति नीस्वंगु खः । थीथी पक्षया व्यक्तिपिं मुंकाः मुक्कं २३ म्ह सिया समिति व झिम्हसिया सल्लाहकार समिति दयेकेगु निर्णय उगु समितिं याःगु दु ।
मुँज्यां नेवाः नुगःपाखें पवित्र बज्राचार्य, नेवाः जागरण मञ्चपाखें सुजीव बज्राचार्य, ध्वाखाबहाः खलःपाखें सर्वज्ञ बज्राचार्य, सामुदायिक विकास संस्था १५ वडापाखें ईश्वरमान डंगोल, च्वय्बुँ धिमेल्वहं टोल सुधार समितिपाखें ज्ञानेन्द्ररत्न बज्राचार्य, नेपाल पर्वतारोहण संघपाखें राजेन्द्र श्रेष्ठ, क्लाइम्बिङ क्लव नेपालपाखें राजीव सेढाईं च्वनादीगु दु ।
