नेपाःया सामाजिक, साँस्कृतिक उत्थानय् ज्यापू समुदायया महत्वपूर्ण भूमिका : प्रधानमन्त्री
प्रधानमन्त्री सुशील कोइरालां नेपाःमि शान्ति, स्थायित्व व अमनचयनया नितिं छगू जक विकल्प लोकतान्त्रिक संविधान जूगु धयादीगु दु ।
ज्यापु महागुथिया स्वक्वःगु तःमुँज्याया थौं शनिवाः बसन्तपुली उलेज्या यानादिसें प्रधानमन्त्री कोइरालां उगु खँ धयादीगु खः । वय्कलं नेपाःमितसें दच्छिया दुने संविधान दयेकीगु अपेक्षा लिसें बिउगु अभिमतयात उच्च सम्मान यासें संविधान दयेकेगु नितिं फुक्क न्ह्यज्यायेमाःगु नं धयादिल । सहमति सहकार्य व एकताया सिद्धान्तयात आत्मसात यासें संविधान दयेकेगु अभियानय् न्ह्यज्यायेत फुक्क राजनीतिक दलयात इनाप यानादिसें प्रधानमन्त्री कोइरालां संविधान दयेकेगु व विकासयात नापनापं यंकेत सरकार प्रतिबद्ध जूगु धयादीगु दु ।
नेपाः बहुजातीय, भाषाभाषी दुगु देश जूगु चर्चा यानादिसें अनेकताय् एकता दुगु नेपाःया विशिष्टता जूगु व नेपाःया सामाजिक, साँस्कृतिक उत्थानय् ज्यापू समुदायया महत्वपूर्ण भूमिका दुगु प्रधानमन्त्री कोइरालां न्ह्यथनादिल । वय्कलं थी थी जातजाति, भाषाभाषी दथुइ एकता सदभाव कायम यायेत ज्यापु समुदायं महत्वपूर्ण भूमिका म्हितेमाःगु खँय् बः बियादीगु दु ।
ज्यापु समुदायपाखें ज्यापु महागुथिया नितिं भवन दयेकेगु, बाजं संरक्षण नापं ज्यापु संग्रहालयया नितिं सरकारलिसे माग याःगु खँय् थः सकारात्मक जूगु व उकिया कार्यान्वयनया नितिं ग्वहालि यायेगु नं विश्वास प्वंकादिल ।
ज्यापु समुदायपाखें संगठन समितिया कजि राजभाई जकःमिं "पहिचानया नितिं अधिकारसहितया संविधान" ज्यापु महागुथिया माग जूगु धयादिल ।
ज्याझ्वलय् ज्यापु महागुथिया स्थापना व विकासय् महत्वपूर्ण ग्वाहालि यानादीपिं विपेन्द्र महर्जन, देब बहादुर डंगोलव ई. मोहनकृष्ण डंगोल लिसेंयात ज्यापु महागुथियापाखें प्रधानमन्त्री कोइरालां हनादीगु दु । (रासस)
