चीनियाँ उपशिक्षा मन्त्री व अरनिको समाजया प्रतिनिधि दथुइ खँल्हाबंला
चीनियाँ उपशिक्षा मन्त्री हाउ फीङ व अरनिको समाजया प्रतिनिधि मण्डल दथुइ खँल्हाबंला जूगु दु । चीनियाँ शिक्षा मन्त्रालयया ब्वनाय् चीनया राजधानी पेइचिङ् वंगु अरनिको समाजया प्रतिनिधि मण्डल नाप चिल्लाथ्व चौथि (फागुन २१ गते) कुन्हु खँल्हाबंला जूगु खः ।
चीनियाँ शिक्षा मन्त्रालयया सभाकक्षाय् जूगु खँल्हाबंलाय् उपशिक्षामन्त्री हाउ फीङं चीनयाँ विश्वविद्यालयाया शैक्षिक डिग्रीयात नेपाल सरकार अन्तर्गतया छुं छुं निकायं मान्यता मबियाच्वंगु खँ न्ह्यथनातदिसें थःज्याःगु खँयात सरकारी तहपाखें समाधान यायेमाःगु व उगु ज्याय् अरनिको समाजं नं ग्वाहालि याइगु बिचाः प्वंकादिल ।
उगु इलय् समाजया नायः डा. सर्वोत्तम श्रेष्ठं चीनया थीथी विश्वविद्यालयय चिकित्सा शास्त्र अध्ययन याना वःपिं नेपाःया विद्ययार्थीतय् इर्न्टनशिप लगायत अझ नं यक्व समस्या दुगु बारे खँ न्ह्यथनादीगु खः ।
समाजं चीनय् अध्ययन याना लिहांवःपिं नेपाःया विद्यार्थीत दथुइ स्वापुयात क्वातुकाः थीथी चीनमौत्री ज्याझ्वः यानावयाच्वंगु खँय् लसता प्वंकूसें थुगुदँ निसें दँय्दसं अरनिको समाजयात बियावयाच्वंगु छात्रवृत्तिया कोटाय् थप झीगु बिइगु खँ नं उपशिक्षा मन्त्री हाउ फीङं जानकारी बियादिल ।
उगु प्रतिनिधि मण्डलय् समाजया नायः डा. सर्वोत्तम श्रेष्ठ, न्हापाम्ह उपाध्यक्ष डा. मनोज मान श्रेष्ठ, महासचिव डा. सुशील प्रजापति व कोषाध्यक्ष बालकृष्ण श्रेष्ठया ब्वति दुगु खः ।
चीनियाँ उपशिक्षा मन्त्री हाउ फीङ व अरनिको समाजया प्रतिनिधि मण्डल
