नेवाः हक हित संरक्षणया निंतिं जागरण मञ्चया प्रशिक्षण
नेवाः जागरण मञ्चं नेवाः हक हित संरक्षणया निंतिं व नेवाः प्रदेश सुनिश्चितताया निंतिं प्रशिक्षण ज्याझ्वः न्ह्याकूगु दु । मञ्चं न्हापांगु प्रशिक्षण ज्याझ्वःकथं वंगु शुक्रवाः थनया क्षेत्रपाटी पार्टी प्यालेसय् सक्रिय दुजःपिन्त प्रशिक्षण ब्यूगु खः ।
उगु प्रशिक्षण ज्याझ्वलय् मूपाहा“कथं झायादीम्ह मञ्चया सल्लाहकार नेवाः न्ह्यलुवा डा. महेशमान श्रेष्ठं नेवाः हक अधिकार कायेगु निंतिं त्वाः त्वालं संगठित यायेमाःगु खँ तयादीगु खः । वय्कलं राजनीतिक दलतय्गु कारणं हे नेवाःत ल्यूने लानाच्वंगु बिचाः प्वंकादिसें नेवाःतय्गु निंतिं नेवाःत हे संगठित जुयाः न्ह्याः वनेमाःगु बिचाः प्वंकादीगु खः ।
जागरण मञ्चया महासचिवलिसें प्रशिक्षक विजयकृष्ण श्रेष्ठं नेवाः हक अधिकार संरक्षणया निंतिं ल्ह्वनेमाःगु पलाः, नेवाःतय्गु वर्तमान स्थितियालिसें अधिकार सुरक्षित यायेगु खँयात कयाः प्रशिक्षण बियादीगु खः ।
मञ्चया नायः सुजीव बज्राचार्यं आःयागु स्थितिइ नेवाःतय्त जागृत यायेगु निंतिं प्रशिक्षण बाहेक मेगु लँपु मदुगु खँ तयादिसें मञ्चं फुक्क हे क्षेत्रय् च्वनाच्वंपिं नेवाःतय्त संगठित यायेगु निंतिं व नेवाः अधिकारया खँ ध्वाथुइकेगु निंतिं प्रशिक्षण ज्याझ्वः निरन्तररुपं तयावनेगु जानकारी बियादीगु खः ।
