ज्यापु महागुथिया अधिवेशनया तयारी
ज्यापु महागुथिया स्वक्वःगु राष्ट्रिय तःमुँज्या थ्वहे वइगु चौलाथ्वः षष्ठी व सप्तमि (चैत्र ८ व ९) निन्हुयंकं जुइगु जूगु दु । महागुथिया स्वक्वःगु राष्ट्रिय तःमुँज्या तःजिक न्ह्याकेगु निंतिं महागुथिया थीथी लागाया अधिवेशन व पार्षद मुँज्या नं न्ह्यानाच्वंगु खँ महागुथिं धाःगु दु ।
महागुथिया येँ“ महानगर समितिया थ्वहे चैत्र १ गते येँया खुसिबुँइ महानगरया पार्षद्या मुँज्या जूगु दु । उगु पार्षद् मुँज्यां ज्यापु महागुथिया न्हूगु विधानकथं अध्यक्ष मण्डलया प्रतिनिधिया निंतिं प्रतिनिधि ल्यज्या याःगु दु । थुगु ल्यज्याय् थः निकटतम प्रतिद्वन्द्वी गोपाल ज्यापुयात लिफ्यासें मचाराजा महर्जनं ‘मुसुम्बहाः’ प्रतिनिधि जुयाः वनेत ताःलाःगु दु । वय्कःपिसं ८७ व २६ मत हयादीगु खः । वय्कःपिंलिसें प्रतिस्पर्धा यानादीम्ह मय्जु उर्मिला डंगोलं धाःसा १३ मत हयादीगु खः ।
थुकथं हे तयारीया झ्वलय् यलय् जूगु यल जिल्ला सम्मेलनं अष्टमान महर्जन, किपू नगर सम्मेलनं राजभाइ जकःमि, महागुथिया येँ उत्तर लागा समितिपाखें बेखानारायण महर्जनपिं अध्यक्ष मण्डलया निंतिं चयन जुयादीगु दु ।
‘पहिचानया संविधान, ज्यापु जातिया अभियान’ धइगु नारा बियाः न्ह्याकेत्यंगु राष्ट्रिय तःमुँज्याया निंतिं ज्यापु महागुथिया थीथी लागाय् पार्षद् मुँज्या व लागा सम्मेलन जुयाच्वंगु खँ महागुथिं कंगु दु ।
