मूल्य वृद्धिया प्यख्यरं बिरोध
नेपाल आयल निगमं पेट्रोलियम पदार्थय् याःगु मूल्य वृद्धियात कयाः प्यख्यरं बिरोध न्ह्याःगु दु । नेकपा–माओवादीं पेट्रोलियम पदार्थय् याःगु मूल्य वृद्धिया निर्णय याकनं लित मकाःसा सतक आन्दोलनय् कुहाँवयेगु ख्याच्वः ब्यूगु दु ।
नेकपा–माओवादीया छ्याञ्जे लिसे संयुक्त जनसमितिया कजि देब गुरुङ्गं थौं छगू विज्ञप्ती पिथनादिसें मूल्य वृद्धि याकनं लित कायेत व जनविरोधी क्रियाकलाप मयायेत सरकारयात इनाप यानादीगु दु ।
निन्हु न्ह्यः जक दुरुया भाः थकाःगु सरकारं पेट्रोलियम पदार्थय् आपालं मूल्य वृद्धि याःगु न्ह्यःथनादिसें गुरुङ्गं मूल्य वृद्धिप्रति च्यूताः प्वंकादीगु दु ।
गुरुङ्गं विज्ञप्तीइ सरकार नीस्वने धुनेवं फुटपाथया व्यापारीतय्त वैकल्पिक व्यवस्था मयासे लाःलाःथे ख्यानाः छ्वयेगु सरकारया थ्व लिपांगु निर्णयपाखें सरकार जनविरोधी ज्याय् सक्रिय दुगु प्रष्ट जूगु न्ह्यःथनादीगु दु ।
निगमदुनेया अनियमितता, इन्धनया चुहावट, अनावश्यक रुपं भर्ती याःपिं कर्मचारीपिनिगु बोझ व व्यवस्थापन असमर्थताया हुनिं निगम घाटाय् वंगु जानकारी बियादिसें सरकार उखेपाखे मिखा तिसिनाः जनतादथुइ थःगु कमजोरी क्यनाच्वंगु बिज्ञप्तीइ न्ह्यःथनातःगु खः ।
अथेहे नेपाल कम्युनिष्ट पार्टी, चुरेभावर लोकतान्त्रिक पार्टी लगायतं पेट्रोलियम पदार्थय् याःगु मूल्य वृद्धिया विरोध याःगु दु । मूल्य वृद्धि याकनं लित मकाःसा आन्दोलन यायेगु उमिसं ख्याच्वः नापं ब्यूगु दु ।
थ्वहे दथुइ थीथी विद्यार्थी संगठनतय्सं नं पेट्रोलियम पदार्थय् याःगु मूल्य वृद्धिया विरोध याःगु दु । सर्वसाधारणयात समस्याय् लाकेगु कथं पेट्रोलियम पदार्थय् आपालं मूल्य वृद्धि याःगु न्ह्यःथना उमिसं विरोध याःगु दु ।
उमिसं याकनं मूल्य वृद्धिया निर्णय याकनं लित कायेत नेपाल आयल निगमयात इनाप नापं याःगु दु । मूल्यवृद्धि लित मकाःसा सशक्त आन्दोलनय् कुहाँवयेगु ख्याच्वः नापं ब्यूगु दु ।
थुखे पेट्रोलियम पदार्थय् याःगु मूल्य वृद्धिया बिरोधय् नेकपा–माओवादी निकट विद्यार्थी संगठन अखिल क्रान्तिकारी यल जिल्ला समितिं थौं चक्काजाम याःगु दु । याकनं स्वयाः याकनं मूल्य वृद्धि पनेत माग यानाः विद्यार्थीतय्सं पाटन क्याम्पस न्ह्यःने न्हिनय् छघौतक्क चक्काजाम याःगु खः । याकनं मूल्य वृद्धि लित मकाःसा कडा आन्दोलनय् वनेगु उमिसं ख्याच्वः नापं ब्यूगु खः ।
