दिलशोभा प्रकरण बारे सहलह मुँज्या
समाजसेवी नापं आमाघरया संस्थापक दिलशोभा श्रेष्ठयात कयाः पिहांवःगु प्रकरणया बारे नेवाः पत्रकारत दथुइ छगू सहलह मुँज्या जुल । नेवाः जागरण मञ्चया ग्वहालाय् जूगु उगु सहलह मुँज्या थुगु प्रकरणयात कयाः आः गज्याःगु पलाः ल्ह्वनेमाली धइगु विषयस सहलह जूगु खः ।
मुँज्याय् दिलशोभा श्रेष्ठया दाजु जित गोपाली श्रेष्ठं थः तता विरुद्ध मखुगु बुखँ पिने हयाः चरित्रहत्या यायेगु कुतः जूगु धयादिल । यदि पिने पिहांवःगु कथं दिलशोभां यौन दुराचार याःगु प्रमाणित जूसाः न्ह्याःगु कथंया सजाय भोगे यायेत नं दिलशोभा तता तयार दुगु जानकारीं नं वय्कलं बियादिल ।
उगु सहलह ज्याझ्वलय् पुलाम्ह महान्याधिवक्ता मुक्ति प्रधानं थ्व विषय सामाजिक व कानूनी विषय जूगु धयादिसें थुकीयात निगूलिं कथं झीसं न्ह्यने यंकेमाःगु धयादिल । वय्कलं दिलशोभाया बारे वःगु बुखँया प्रकृति स्वयेगु खःसा थन अदालत स्वयां न्ह्यः पत्रकारतय्सं हे फैसला न्यंकेगु ज्या यानाः विकृति हःगु धयादिल ।
गोरखापत्र न्हिपौया सम्पादक पुष्कर माथेमां थ्व विषय संचार माध्यमं पिहांवगुलिं थुकीया सत्य तथ्यता बारे संचार माध्यमपाखें हे प्रेसर बिइमाःगु बिचाः प्वंकादिल । अथेहे सन्ध्या टाइम्स न्हिपौया सम्पादक सुरेश मानन्धरं यौन दुराचारया द्वपं बियाः न्ह्याःगु थुगु प्रकरणय् यथेस्थ प्रमाण मदुगुलिं आः उगु विषय वस्तुयात मेमेगु खँ नाप स्वाना विषययात मेगू मोड बिइत स्वयाच्वंगु धयादिल ।
मुँज्याय् ब्वति काःपिंसं दिलशोभायात यौन दुराचारया द्वपं बिउगु प्रमाण मदुगुलिं आः उकीया विरुद्ध मानहानीया मुद्दा तयेमाःगु बिचाः प्वंकूगु खः । नापं थुगु विषययात जातिय रुप मबिउसें थप ज्याझ्वः नापं झीगु पाखें नं अनुसन्धान यायेमाःगु बिचाः प्वंकूगु खः ।
