दूरुया भाः थहां वंन
दुग्ध संस्थानं दुरुया उत्पादन लागत थहां वंगु धासें बुधवाः निसें छ्यलाबुला वंइगु कथं दुरुया भाः थकाःगु दु ।
नेपालय् दुरुया माग कथं आपुर्ति जुइमफुगूलिइ व किसानतय्तं पशुपालनय् आकषर्ण यायेगु ताःतुना दुरुया भाः थकानागु खँ संस्थानं धाःगु दु । भाः थहां वनेधुंकाः संस्थागत कथं पशुपालन ज्या न्ह्याःवनेगु नापं भारतं आयात जुइगु दुरुया परिमाण म्हो जुया वनेगु आशा याःगु दु ।
संस्थानया सञ्चालक समितियया मंगलवाः च्वंगु बैठकं दुरुया भाः थकायेगु निर्णय याःगु खः । प्रति बछि लिटरया प्याकेतय् स्वतका द्येबाः थहां वंगु दु धाःसा थुगू इलय् नेपालय् १ लखः २६ हजार लिटर दुरुया अभाव दुयाच्वंगु दु । थहां वंगु भाःया ६९ प्रतिशत द्येबाः किसानया दइग खँ नं संस्थानं दाबी याःगु दु । दुग्ध संस्थानं दुरुया भाः थकायेधुंकाः निजी डेरी उद्योगतय्सं नं भाः थकायेगु तयारी याःगु दु ।
