नेपालभासाख्यलय् न्हूगु वाः पौ लहना पिथन
नेपाल भासाख्यलय् न्हूगु वाः पौ कथं लहना वाः पौया विमोचन यायेगु ज्या क्वचाःगु दु । मंगलवाः जमलया ग्रिन पार्टीप्यालेसय् छगु ज्याझ्वया दथ्थुइ मुपाँहा भाजु पुष्कर माथेमापाखें थुगू वाः पौ उलेज्या यानाः दिगु खः ।
तय्जु पब्लिकेशया निंतिं नृपेन्द्रलाल श्रेष्ठपाखें थुगू वाः पौ पिथनेत्यंगु खः सा लहना वाः पौया सम्पादक कथं केके मानन्धर, सहसम्पादक जुजुमान महर्जन, संवादाता शीला साय्मी व व्यवस्थापक सुरेन्द्रभक्त श्रेष्ट कथं च्वनादिगु दु ।
झीगु समुदाय दुने झीगु हे खँ सञ्चार यायेत व सम्बन्धित सरोकारवालायात तकं सचेत याकेत न्हूगु आयाम कथं व देय् दुने पिनेया बुखँ थःगु भासं सन्तुलित कथं प्रकाशित यायेत लहना वाः पौ ज्वनाः वयाःगु खँ लहना वाः पौया सम्पादक केके मानन्धरं कनादिगु खः । अथेहे पाँहा कथं ब्वति कयादिम्ह सन्ध्या टाइम्सया सम्पादक सुरेश किरण मानन्धरं रहर पिथनेगु ज्या जक जुइ मजिल, पत्रिकारी विकास जक जुया जक मगाः पत्रिका विकास नाप नापं पत्रकारीता नं विकास जुइमाःगु व भासा विकास, व्यवसायिक पत्रकारीता नं विकास जुइमाःगु खँ कनादिगु खः । नापं जनजाती भासाया पत्रकारीता विकास यायेत प्रजातन्त्र व अभिब्यक्ति स्वतन्त्रता जक दया मगाःगु खँ कनादिल ।
