ल्वाभः ज्वनाः जुइगु अले सतकय् गाइजात्रा क्यनीगु : केसी
राष्ट्रिय जनमोर्चाया नायः चित्रबहादुर केसीं सरकारय् हे दुगु दलया कार्यकर्तां ल्वाभः ज्वना जुयाच्वंगु इल ज्वंम्ह प्रहरीयात हे कारबाही यायेत माग यानाः सतकय् आन्दोलन यानाः गाइजात्रा क्यनेत स्वःगु धयादीगु दु ।
व्यवस्थापिका संसदया थौंया बैठकया शून्य इलय् न्ववानादिसें नायः केसीं छुं दिंनिसें सत्ता पक्षया हे सुं सुं मनुखं बन्दुक ज्वनाः वंगु इलय् प्रहरीं ज्वंबलय् प्रहरीयात हे कारबाही यायेगु माग यानाः सतक जाम याःगु न्ह्यःथना थुगु विषयसं सरकारं याकनं सदनयात लिसः बीमाःगु माग यानादीगु दु ।
नेकपा एमालेया नेता सुरेन्द्र पाण्डें सरकारय् च्वना थःगु हे भातृ संस्थां अपराधिक क्रियाकलाप याःबलय् व ल्वाभःलिसे अःखतं प्रहरीयात कारबाहीया माग यायेगु मछालापुस्से जूगु धयादीगु खः । येँया शंकरदेव क्याम्पस नेविसंघया ल्याय्म्हपिं ल्वाभःलिसे ज्वंगु खः ।
बैठकय् नेपाली कांग्रेसया सभासद् महालक्ष्मी डिना उपाध्यायं सप्तरीइ अन्तर्राष्ट्रिय महिला दिवस (८ मार्च) या हे दिं प्वाथय् दुम्ह नजराना खातुनयात म्वाःम्वाकं च्याकाः स्यानाः बिलं नं सरकार मौन च्वंगु न्ह्यःथना कुंखिनादीगु दु ।
