रंगया पर्व फागु चीर धस्वाकाः न्ह्यात
थःथवय् मेलमिलाप व सद्भावया सन्देश ज्वनाः वइगु होली पर्व अर्थात फागु पुन्हि थौंनिसें विधिवत रुपं न्ह्याःगु दु । स्वनिगःया स्वंगुलिं दरबार क्षेत्रय् चीर धस्वाकेवं विधिवत् रुपं फागु पुन्हि न्ह्याःगु खः ।
सुथय् च्याताः ई जुयाः स्वंगू मिनेटया साइतय् येँया बसन्तपूसं परम्परागत रुपं चीर धस्वाकेवं फागु औपचारिक रुपं न्ह्याःगु खः । फागुन शुक्लाष्टमिया दिं येँया बसन्तपूसं च्वंगु गद्दी बैठक न्ह्यः सिमायात रङ्गीचङ्गी ध्वजापतालिसे छायेपियाः धस्वाकाःतःगु चीरय् पूजा यायेवं फागु न्ह्याःगु खः ।
हिन्दू धर्मकथं थः विष्णुभक्त काय् प्रल्हादया हत्या यायेत स्वम्ह दैत्यराज हिरण्य कश्यपुया केहेँ होलिकां छल याःगु बाखं कःघानातःगु दु । प्रल्हादयात स्यायेगु योजनालिसे ह्वाना ह्वानाच्वंगु मिं दुहाँ वंबलय् होलिका थःहे भष्म जूगु तर प्रल्हादयात छु नं मजूगु प्रसंग थ्वलिसे स्वानाच्वंगु खः ।
शक्तिया दुरुपयोग याइम्ह होलिका सीगु इलंनिसें होली अथात् फागु म्हितेगु परम्परा न्ह्याःगु कथं कायेगु याः । स्वनिगःलिसे पहाडय् चैत्र २ गते तराई क्षेत्रय् धाःसा कन्हय् खुन्हु ३ गते होली हनेगु याइ ।
