संविधान पिहाँवःगु दिं खुन्हु च्याकाः बीगु : गुरुङ
नेकपा–माओवादीया छ्याञ्जे देब गुरुङ्गं संविधानसभाय् यथास्थितिवादी शक्तित हाबी जूगु व क्रान्तिकारीत अल्पमतय् लाःगुलिं २०४७ सालया हे संविधान जारी जुइगु ग्याःचिकु दुगु खँ न्ह्यःथनादीगु दु ।
क्रान्तिकारी पत्रकार महासंघ स्याङजां थौं सदरमुकाम वालिङय् ग्वसाः ग्वःगु पत्रकार नापलाये ज्याझ्वलय् न्ववानादिसें वय्कलं संविधानसभाय् क्रान्तिकारीत समस्याय् लाःगु बिचाः प्वंकादीगु खः । यथास्थितिवादीया बाहुल्यता दुगु संविधानसभापाखें पिहाँवइगु संविधानं देशय् निकास मदइगु वय्कःया धापू खः ।
संविधानसभा पिने दुगु छगू शक्तियात बाइपास याना संविधान पिकाःसा थःपिंत स्वीकार्य मजुइगु धयादिसें गुरुङ्गं एकलौटी रुपं संविधान पिकाःसा उकियात पिकाःगु दिं खुन्हु हे च्याकेगु ख्याच्वः नापं बियादीगु दु ।
एकीकृत नेकपा माओवादी पालुङटार विस्तारित बैठकं पास याःगु दस्तावेजय् लिहाँवःसा उपिंलिसे पार्टी एकता सम्भव दुगु वय्कःया धापू खः ।
