स्थानीय निकायया चुनाव याकेगु तयारी जुयाच्वंगु दु : सिंह
उपप्रधान लिसे स्थानीय विकास मन्त्री प्रकाशमान सिहं सरकारं स्थानीय निकायया चुनाव यायेगु तयारी यानाच्वनागु धयादीगु दु । प्रेस युनियनं थौं रुपन्देहीया बुटवलय् ग्वसाः ग्वःगु पत्रकार सम्मेलनय् सिंहं संविधान दयेकेधुंकाः न्हूगु संरचनाय् चुनाव जुइगु जूगुलिं अन्तरिम ईया नितिं जूसां नं स्थानीय चुनाव यायेमाःगु धयादीगु दु ।
वय्कलं स्थानीय स्वायत्त शासन ऐन २०५५ व अन्तरिम संविधान २०६३ सं ल्वानाच्वंगु विधि व प्रक्रियायात संशोधन यानाः जूसां नं स्थानीय निकायया चुनाव याकनं घोषणा यायेगु पक्षय् सरकारं गृहकार्य न्ह्याकाच्वंगु जानकारी बियादीगु खः ।
स्थानीय निकायया चुनावया तिथि घोषणा सरकार लिसे संविधानसभा दुने व पिने दुगु राजनीतिक पार्टीतय्गु सहमतिइ जुइगु वय्कःया धापू खः । ताःहाकःगु इलंनिसें स्थानीय निकाय जनप्रतिनिधि विहीन जुयाः विकास निर्माणया ज्याय् लिच्वः लाःगु सिंहं धयादीगु दु ।
थ्वहे दथुइ, ऊर्जामन्त्री राधा ज्ञवालीं सरकार गुलिफु उलि याकनं स्थानीय निकायया निर्वाचन यायेगु तयारीइ दुगु धयादीगु दु ।
अन्तर्राष्ट्रिय मिसा दिवसया लसताय् (अनेरास्ववियुं) थौं ग्वसाः ग्वःगु ¥यालीया उलेज्या यानादिसें वय्कलं लिपांगु खुसिइ ग्रामीण क्षेत्रय् जुयाच्वंगु मिसा हिंसाया घटना पनेत याकनं स्थानीय निकायया निर्वाचन यायेमाःगु खँय् बहः नापं बियादीगु खः ।
