गृहमन्त्रीया अभिव्यक्तिप्रति नेकपा–माओवादीया च्यूताः

उपप्रधान लिसे गृहमन्त्री वामदेव गौतमं जनयुद्धकालीन मुद्दात छगू÷छगू याना छानबिन याना कारबाही यायेगु धकाः ब्यूगु अभिव्यक्तिप्रति नेकपा–माओवादीं गम्भीर ध्यानाकर्षण जूगु न्ह्यःथंगु दु ।

पार्टी प्रवक्ता पम्फा भुसालं थौं छगू बिज्ञप्ती पिथना झिंनिगू बुँदे सहझदारी, बिस्तृत शान्ति सम्झौता लिसे अन्तरिम संबिधानया मर्म अःखः बेपत्ता नागरिक सार्वजनिक यायेगु, जनयुद्धया इलय् जूगु मानवअधिकार उल्लंघनबारे सत्य निरुपण लिसे मेलमिलाप व बेपत्ता सार्वजनिक यायेगु आयोग नीस्वनाः सामाजिक मेलमिलापया लकस निर्माण यायेगुया पलेसा कारबाहीया घोषणा याःगु न्ह्यःथना भत्र्सना याःगु दु ।

तत्कालीन सरकार व माओवादी दथुइ मखुगु मुद्दात खारेज यायेत जूगु सहमतिया बर्खिलाप यानाः गलत अभिष्ट पूवंकेगु उद्देश्यं सामान्य कानूनकथं मुद्दात छगू÷छगू यानाः छानबिन यायेगु, क्षतिपूर्ति बीगु धायेगु बृहत राजनीतिक सहमतिकथं ल्वापु व्यवस्थापन व मेलमिलापया सरकारी दायित्वपाखें लिचिलेगु निकृष्ट अभिव्यक्ति जूगु माओवादीं दाबी याःगु दु ।

‘युद्धकालया राजनीतिक आस्थाया आधारय् ब्यूगु मखुगु मुद्दा खारेज यानाः अज्याःगु मुद्दा तइपिंत कारबाही यायेगु, बेपत्ता नागरिक सार्वजनिक यायेगु, युद्धकालया मानवअधिकार उल्लंघनया घटनाया तथ्यया आधारय् राजनैतिक सहमति व मेलमिलाप यायेगुया पलेसा, वयात थनाः हाकनं ल्वापु ब्वलंकेगु तयारी व सार्वजनिक घोषणा यायेगु नितान्त गलत जूगु खँ’ बिज्ञप्तीइ न्ह्यःथनातःगु दु ।

नेकपा–माओवादीं गैरजिम्मेवार अभिव्यक्ति याकनं भिंकेत, बेपत्ता नागरिक सार्वजनिक यायेत लिसे सत्य निरुपण व मेलमिलाप आयोगपाखें पिदंगु समस्या समाधान यायेत माग नापं याःगु दु ।