स्वदेशी वस्तु छ्यले : राष्ट्रपति यादव
राष्ट्रपति डा. रामवरण यादवं स्वदेशय् हे उत्पादित बस्तु छ्यलेगु बानी यायेमाःगु धयादीगु दु । भृकुटीमण्डपय् थौंनिसें न्ह्याःगु स्वक्वःगु अन्तर्राष्ट्रिय व्यापार मेलाया उलेज्या यानादिसें राष्ट्रपति यादवं उगु खँय् बहः बियादीगु खः ।
नेपाल सरकार व उद्योग बाणिज्य महासंघया ग्वसालय् जूगु मेला उलेज्या यानादिसें वय्कलं मेलां स्वदेशी बस्तुया प्रचार प्रसार यानाः निर्यात प्रबद्र्धन यायेगु ज्याय् ग्वाहालि यायेगुया नापनापं विदेशी प्रविधि दुकायेत ग्वाहालि यायेगु न्ह्यःथंगु दु ।
फागुन २६ गतेतक्क न्ह्याइगु उगु मेलाय् नेपाल बंगलादेश, चीन, भारत थाइल्याण्ड लगायत देय्या स्टल तयातःगु दु । मेलां स्थानीय बस्तुया प्रबद्र्धन यानाः विदेशी बजाः मालेत ग्वाहालि यायेगु उद्योग बाणिज्य संघया नायः सुरज वैद्यं धयादीगु दु ।
मेलाय् निर्यात योग्य धकाः सरकारं न्ह्यःथंगु झिंगुंगू बस्तु लिसे सेवाया प्रबद्र्धन यायेत मेला ग्वसाः ग्वयागु न्ह्यःथंगु खः । मू आकर्षणय् जडिबुटी महोत्सव, बहुमूल्य तिसा ज्वलं प्रदर्शनी दइगु मेलाया कजि कल्याणकृष्ण ताम्रकारं जानकारी बियादीगु खः ।
