उपचारया नितिं धकाः ओली दिल्लीइ
नेकपा एमाले संसदीय दलया नेता केपी शर्मा ओली थौं भारतया राजधानी न्हूगु दिल्ली झायादीगु दु । नियमित स्वास्थ्य उपचारया नितिं न्ह्यःथना नेता ओली झायादीगु खः ।
ओली न्हिनय् प्यताः इलय् एयर इण्डियाया विमानपाखें दिल्ली झायादीगु नेता कृष्णगोपाल श्रेष्ठं जानकारी बियादीगु खः । ओलीलिसे वय्कःया जहान राधिका शाक्य, राजेश शाक्य व ग्वाहालिमि इन्द्र भण्डारी नं दिल्ली झायादीगु खः ।
ओलीं दिल्लीया म्याक्स अस्पतालय् वासः याकेगु नितिं झायादीगु खः । ओलीं वंगु दँ दिल्लीया एपोलो अस्पतालय् मृगौला प्रत्यारोपण याकादीगु खः ।
युरिक एसिडया समस्या तच्वयाः वयेवं लिपांगु खुसिइ ओली येँया ग्राण्डी अस्पताल भर्ना जुयादीगु खः । च्यान्हु अस्पताल च्वना ओली शनिवाः जक डिस्चार्ज जूगु खः ।
दिल्लीइ च्वनेगु झ्वलय् ओलीं राजनीतिक नापलाये ज्या नं जुइगु श्रोतं न्ह्यःथंगु दु । अथेन नेता कृष्णगोपाल श्रेष्ठं नापलाये ज्या जुइगु पक्का मजूगु तर छम्ह राजनीतिक मनुखं राजनीतिक नापलाये ज्या जूसां मेकथं कायेमज्यूगु धयादीगु दु ।
