डुङ्गा दुर्घटनाय् प्यम्ह सित, न्हय्म्ह बेपत्ता

नेपाल भारत सीमाय् दुगु मोहना खुसिइ नांचा (डुङ्गा) फातापुलाः प्यम्ह मनूत सीगु दुसा न्हय्म्ह बेपत्ता जूगु दु । उकिइ मध्ये न्हय्म्ह मनूतय्गु म्हसीका लूगु दु ।

नांचा दुर्घटनाय् सीपिं लालबोझी गाविस १ या सन्दिप चौधरी, लालबोझी ३ या फुलमती लोनिया, न्हय्लाया मिसा मचा सलिना अली व लजावती लोहनी जूगु न्ह्यःथंगु दु । लजावती भारतया बेलेराय अस्पतालय् वासः यायेगु झ्वलय् सीगु खः ।

प्रहरीयाकथं नन्दाकली चौधरी, पुष्पादेवी कठरिया, कलिया लोनिया, गुंगी लोनिया, चुनादेवी व नां सीमदुनिम्ह छम्ह बुरी जूगु न्ह्यःथंगु खः । उपिं फुक्क लालबोझी ३ या बासिन्दापिं खः । दुर्घटनाय् छम्ह भारतीय मिसा मचा रुसार अली नं बेपत्ता जुयाच्वंगु दु । बेपत्ता जूपिनिगु ल्याः अप्वय् पूmगु प्रहरीं धुकूमाः याःगु दु ।

सीम्ह न्हय्लाया सलिना अलीया मां माओलेना अलिया भारतया बेलेराय अस्पतालय् वासः जुयाच्वंगु दु । मोहना खुसिया हलौना घाटय् म्हिगः सनिलय् दुर्घटना जूगु खः । नांचाय् थ्यंमथ्यं नीन्याम्ह मनूत दुगु घाःपाः जूपिंसं न्ह्यःथंगु खः ।

चिग्वःगु नांचाय् क्षमता स्वयाः आपालं यात्रु व नांचाय् लः वनाः दुर्घटना जूगु धुकूमा प्रहरीं याःगु दु । मेगु दिंया तुलनाय् वा वःगु हुनिं खुसिइ लः अप्वःगुलिं नं नांचा दुर्घटना जूगु जुइफुगु जानकारी ब्यूगु खः ।