भारतपाखें आयत म्हो जुइवं वासःया अभाव
भारतपाखें आयात म्हो जुइवं नेपालय् थीथी कथंया वासःया अभाव जुयाः वयाच्वंगु दु । विशेषयानाः वरिष्ठ चिकित्सकतय्गु न्हापांगु धलखय् भारतीय कम्पनीत सन्, रेनव्याप्सी, वेलकम, ब्ल्याक लगायत कम्पनीया वासःत अभाव जूगु व्यवसायीतय्सं न्ह्यःथनेगु याः ।
चिकित्सकतय्सं ल्यइगु एन्टिबायोटिक, एन्टिफंगल लगायतया वासः अभाव जुइवं गुलिखय् ल्वगित वासः न्यायेत भारतीय सीमा क्षेत्रया वासः पसलय् वनेत बाध्यता थें नं जूगु दु ।
नेपालय् सुगर अर्थात चिनी ल्वय् व मुटु सम्बन्धी वासः निर्यात यानाः वयाच्वंगु भारतीय सन् कम्पनीं थःगु थाय्बाय् हिलेवं नेपालय् वासः वयेमफुगु व्यवसायीपिनिगु धापू दु । थाय्बाय् हिलेवं नेपालय् हाकनं दर्ता जुइमाःगु प्रावधानया हुनिं सन् कम्पनीया वासः वयेगु त्वःतूगु औषधी व्यवसायी राजेश अग्रवालं जानकारी बियादिल ।
वासः अभाव जुइवं ल्वगिं आपालं खर्च यानाः भारतपाखें वासःया माग यायेगु यानाच्वंगु वय्कलं जानकारी बियादीगु दु । औषधी व्यवस्था विभागया महानिर्देशक गजेन्द्र भुजुं धयादी थःत वासः अभाव जूगु बारे छु नं जानकारी हे मदुगु प्रतिक्रिया बियादीगु दु ।
