वरिष्ठ सञ्चारकःमि हरि श्रेष्ठ मन्त

सिंहदरबारपाखें प्रशारण जुइगु रेडियो नेपाल सञ्चालन जूसांनिसें हे नियमित रुपं नेपालभाषां बुखँ बियाः वयाच्वनादीम्ह वरिष्ठ सञ्चारकःमि हरि श्रेष्ठ मन्त । वय्कः न्हापा येँया भ्वसिक्वय् च्वना वयाच्वनादीगु खःसा लिपांगु इलय् वया येँया हे मैतिदेवीइ च्वना वयाच्वनादीगु खः । वय्कः बुधवाः चान्हय् निता इलय् अस्पतालय् वासः याकु याकुं मदुगु खः ।

म्ह मफयाच्वंम्ह च्यय्च्यय्दँया श्रेष्ठया सिथं यंकेगु ज्या थौं हे जूगु खः । पशुपतिया आर्यघाटय् सिथं यंकूगु खः । वय्कः नियमित रुपं वि.सं. २०६० सालतक्क नं रेडियो नेपालय् ज्या यानाः वयाच्वनादीम्ह व्यक्तित्व खः । वरिष्ठ सञ्चारकःमि श्रेष्ठयात छुं दँ न्ह्यः जक नेवाः पत्रकार राष्ट्रिय दबूपाखें वरिष्ठ सञ्चारकःमि कथं वय्कःयात हनादीगु खः । मदुम्ह श्रेष्ठया छम्ह जहान, स्वम्ह काय् व छम्ह म्ह्याये दु ।