हानं भारत हे त्यात सुशील कोइरालाया छ्यं क्वछुल

कांग्रेस व एमालेया ल्वापुइ गुलिसिनं एमाले हे त्यात धा:पिं नं दु । गुलिसिनं हानं सुशील कोइरालां मन्त्रिमण्डल विस्तार याये खनीगु जूगुलिं वयात नं बूगु धाये मज्यू धका: कूटनीतिक पहलं खँ ल्हाइपिं नं पिहां वल । तर तछ्याना: हे न्ववायेगु ख:सा थन छम्ह हे जक त्या:गु दु । व ख: – भारत ।
न्हापा जूसा भारतं नेपालय् न्ह्याग्गु परिवर्तन जूसां लव: काइगु धका: जक धाइगु ख: । आ: ला उकथंया परिवर्तन नं जुइके म्वा:थें खनेदत ।
“नेपा: देसय् माइक्रो म्यानेजमेन्ट यायेमते” धका: प्रचण्डं धयात:गु जूसां गृह मन्त्रालय छगूया विवादय् नं भारतं हे ल्हा: त:गु खनेदत । अले भारतं गन हस्तक्षेप या:व:गु ला: ? थ:थ:हे मिले मजुसेंलि भारतं ला ल्हा: तइ नि धका: हस्तक्षेपया औचित्य साबित याना: हस्तक्षेप जूसां स्वाभाविक रुपं कायेकेगु ज्या याइपिं भारतीय पक्षधरत नं त्या:गु हे दु ।
नेपाली कांग्रेस धइगु लोकतान्त्रिक पार्टी ख:, अथेजूगुलिं भारतं न्हापांनिसें ग्वाहालि याना वयाच्वंगु, आ: नं ग्वाहालि यायेमा:, माओवादीयात ग्वाहालि यायेगु पाय्छि मजू धका: न्ववानाजूम्ह सुशील कोइराला भारतनाप प्रशासनिक पह:या नेटवर्किङय् मदुगु जुयाच्वन । राजनीति याना जूम्ह मनू राजनीति हे याना जूगु जुयाच्वन । तर गुबले वय्क: राज्य प्रशासननापं न्ह्याकेमा:गु प्रधानमन्त्री पदय् थ्यन, वय्क:या राजनीतिं ज्या मबिल ।
वय्क: प्रधानमन्त्री जुइ न्ह्य: हे जूगु छगू दुबिस्ता ब्याकेगु मुँज्याय् वय्क: सत्तीपिं कांग्रेसी नेतातसें वय्क:यात भारतनाप नं सल्लाह साहुति ब्याका: खँ ल्हायेत सुझाव ब्यूगु जुयाच्वन । तर वय्कलं थ:पिसं हिन्दुस्तानयात चाकडी बजे याना: प्रधानमन्त्री जुइगु पलेसा प्रधानमन्त्री हे जुइमखु धका: धा:गु जुयाच्वन । थ्व खँ नं भारतीय दूतावास, लैनचौरय् थ्यंगु जुयाच्वन ।
थ्वयांल्यू एमालेय् केपी ओली संसदीय दलया नेता पदय् वयेवं हे वय्क:या शुभचिन्तक कांग्रेसीतसें हानं सम्झे या:गु जुयाच्वन । तर उगु इलय् नं सुशील कोइरालां इमित ब्व: ब्यूगु जुयाच्वन – छिपिं लैनचौर, एभरेष्ट होटेल व विष्णु पौडेलया छेँय् च्वना: मा:गुं म्वा:गुं सल्लाह याना जुइगु जिं स्यू । छिमिसं उकथं सल्लाह याना जुल धायेवं तुं जिं छिमिसं छु छु धाल, व हे खँ न्यनेगु ला ?
थुथाय् एमालेयात गृहमन्त्री बीगु धका: धया: कांग्रेस – एमाले खँ मिले या:म्ह कृष्ण सिटौला ख: । कृष्ण सिटौला गनं परिचालित मनू धका: सकसिनं हे स्यू ।
कृष्ण सिटौलां सुशील कोइरालायात खँ माने याकेत आपालं कुत: यानाच्वंगु ख: । तर माने मजू ।
अन्तत: भारतं करण सिंह वयेधुंका: आकाझाकां हे खँ मिले जुइगु वातावरण वल । थुकिं भारत त्यात, सुशील कोइरालाया छ्यं क्वछुत ।
सुशील कोइराला थुज्व:म्ह अड्डी व जिद्दी बुरायात खँ माने याके फइमखु, धइगु ‘रअ’या एजेन्टतय्गु रिडिङ हे दुगु जुयाच्वन ।
अथेजूगुलिं दूतावासया सुं नं मनुखं नं वय्क:यात कन्ट्याक्ट याना: खँ मल्हा:गु व सुशीलं नं इमित कन्ट्याक्ट याना: खँ मब्याकू । अथेजूगुलिं इमिसं ला कोइरालायात लच्छिनिसें स्वलातकया दुने चीका: न्हूगु विकल्पय् वनेगु तयारी यानात:गु खनेदु । तर भारतया नं राजनीतिक तहलय् हे थ्व खँ थ्यसेंलि करण सिंह हे वया: राजनीतिक पहलं हे सुशील कोइरालानाप खँ ल्हा:गु ख: ।
अन्तत: एमालेयात गृहमन्त्री बीत प्रधानमन्त्री कोइराला सकारात्मक जूगु धइगु बुखँ शनिवा: बहनीनिसें हे न्यनेदत । आइतवा: बय्बय् जुल । बहनीतक जूबलय् कांग्रेस–एमालेया खँ मिले जुल धइगु बुखँ वल ।
थ्वहे झ्वलय् न्हूगु छता खँ नं पिहां व:गु दु । व ख: नेपा:या मन्त्रालयतय्त ‘शक्तिशाली’, ‘विकासे’ व ‘जनमुखी’ धइगु वर्गीकरण । निगू दलया दथुइ मन्त्रालयया बाँडफाँड जुइबलय् थुकथंया हे वर्गीकरणया लिधंसाय् जुइगु हँ । शक्तिशाली मन्त्रालय धायेबलय् गृह व अर्थ थुज्व:गु जुल । विकासे धायेबलय् आवास व भौतिक थुज्व:गु जुल । जनसम्पर्क धायेबलय् शिक्षा, स्वास्थ्य, स्थानीय विकास थुज्व:गु जुल ।
थुकथं जूबलय् नेपा:या मन्त्रालयत ला जा, केँ, तरकारी, अचार धका: छुटे याना: भागबण्डा याना: नयेगु खँ जुल । थ्व ज्यायात घटिया धायेगु ला कि छु धायेगु धइगु न्ह्यस: नं आ: पिथनेमा:गु जुयाच्वंगु दु ।
तर आ:या मू चर्चा धइगु नेपालय् भारतीय चलखेलया राजनीतिया हावी हे ख: । दकलय् न्हापां ला भारतयात नापं उपयोग याना: राजनीति सफल याना: धइम्ह प्रचण्डयात घेराबन्दीइ लाकुलाकुं हे धुँचां छुंचा दयेकेगु ज्या भारतंयात ।
अनंलि प्रचण्डं हया: प्रधानमन्त्री जूम्ह झलनाथ खनालयात स्वलाया दुने चीका: छ्वयाबिल, व आ: वया: पार्टीपाखें नं चीका छ्वयेगु निंतिं ओली न्ह्यचिलाच्वन । अनंलि आ: गिरिजा प्रसाद कोइरालाया दं नया: पार्टी दुने थ:गु अस्तित्व तया: प्रधानमन्त्री जूव:म्ह सुशील कोइरालायात नं क्वछुकां तुं त्व:तल ।
खतुं सुशील कोइरालां प्रचण्डं थें हे राजीनामा बिया: थ:त ‘हाई हाई’ नं धायेकेफुगु ख:, तर राजीनामा बिया: क्षणभरया निंतिं हिरो जूम्ह प्रचण्डया दशा खना: वय्कलं थुगु लँपु धा:सा कयामदी ।

More Stories Like this