संकिपा ख्य:या थां सुरेन्द्र तुलाधर

नेपालभाषा ख्यलय् प्यम्ह ज्व:मदुपिं साहित्यकारतय्त प्यंग: थांया रुपय् कयात:गु दु । नेपालभाषाया संकिपा ख्यलय् नं थथे प्यंग: थांकथं कायेमा:सा सुरेन्द्र तुलाधरया नां नं छग: थांया रुपय् न्ह्य:ने वइ । सुरेन्द्र तुलाधर बहुप्रतिभाशाली कलाक:मि ख: । छम्ह च्वमि ख:, छम्ह निर्देशक ख:, छम्ह अभिनेता ख:, उलि जक मखसें छम्ह म्ये च्वमि नं ख: । थम्हेसिनं दयेकूगु दक्व धइथें संकिपाय् वं थ:म्हेसिनं म्ये नं च्व:गु दु । आ:ला अझ छपला: न्ह्या: वना: सुरेन्द्रं म्ये नं हालेधुंकूगु दु । छम्ह संगीतकारया रुपय् झिदँ न्ह्य: हे सपनाश्रीया निपु म्येय् लय् चिनेगु ज्या याये धुंकूम्ह सुरेन्द्र तुलाधरं आ: थ:गु न्हूगु संकिपा “जि ला जेन्टलम्यान”या छपु म्ये थ:म्हेसिनं हे हालीगु जूगु दु ।
थुकथं कलाया विविध ख्यलय् थ:गु प्रतिभा न्ह्यब्वया वयाच्वंम्ह सुरेन्द्र तुलाधर आ: धा:सा नेपालभाषाया ख्यलय् जक लिकुना मच्वनीगु जूगु दु । खय्तला वयागु न्हापांगु पला: हे खस नेपाली भाय्या नाटक “ऊ फेरी आउनेछ’ पाखें न्ह्या:गु ख: । थ्व वि.सं. २०४७ सालया खँ ख: । उगु इलय् सुरेनद्र तुलाधरया लजगा: छगू प्रेसया जागिर ख: । अन हे प्रेसय् शुभरत्न बज्राचार्य नं ग्यालि कम्पोजिटरया जागिर नयाच्वंगु ख: । इपिं निम्हं पासा जुल । निम्हेसियां शोख धइगु कलाख्य: लानाच्वन । थ्वहे झ्वलय् पासा शुभरत्नं छन्हु सुरेन्द्रयात धर्मवत् शर्मा “तुफान” नांयाम्ह नाटक निर्देशकया थाय् यंकल । तुफानभाजुं वयात “ऊ फेरी आउनेछ” नाटकय् हवल्दारया रोल छगू बिल । रोल चीधं । अय्सां सुरेन्द्र हारे मचा । व न्हिं न्हिं रिहर्सलय् वन । वहे नाटकय् इन्स्पेक्टर जुया म्हितिम्ह छम्ह कलाकार धा:सा आपा: याना: रिहर्सलय् मवइगु । अले इन्स्पेक्टरया डाइलग नं सुरेन्द्रं हे ब्वनेमालिगु । सुरेन्द्रया स: त्याजिगुलिं वयात इन्स्पेक्टरया हे रोल बिइगु खँ जुल । वया लसता अझ अप्वल । अन वं इन्स्पेक्टर जुया: रिहर्सल यायेगु शुरु यात ।
रिहर्सल जुयाच्वंबलय् छन्हु बुरा जुया: म्हितिम्ह कलाकार मवल । उम्ह कलाकारया डाइलग नं सुरेन्द्रं हे न्ववाये मा:गु जुल । “जिं नं ख्या: यायेभनं उम्ह बुर्‍हा पात्रया डाइलगयात बुर्‍हा पह: वयेक हे ब्वना यंका । जिगु पर्फर्मेन्स खना: डाइरेक्टर खुसी जुल । जित: वहे बुर्‍हाया रोल बिल ।” कला ख्यलय् न्हापांगु पला: न्ह्याकागु ईयात लुमंका: सुरेन्द्रं धाल । व रोल हिरोनीया अबुया रोल जुयाच्वन । नीदँति दुगु इलय् हे च्यय्दँ दुम्ह बुर्‍हा जुया: म्हिता: थ:गु पला: न्ह्याकूम्ह सुरेन्द्रया पला: अनंलि नेपालभाषाया ख्याल: ख्य:पाखे न्ह्यात । उगु इलय् पलिस्थाया ख्याल: कासा तसकं नांजा:गु कासा ख: । वहे ख्याल: कासाय् दुथ्या:गु छगू ख्यालखय् म्हितीपिं निम्ह ल्याय्म्ह मालाच्वंगु जुयाच्वन । उकी मध्ये छम्ह शरद कसा:या ल्यज्या जुल । मेम्ह सुरेन्द्र तुलाधरयात ल्यल । उगु ख्याल:या नां “हल हल” ख: । अले श्रीकृष्ण अणु उकिया निर्देशक । श्रीकृष्ण छम्ह नांजा:म्ह ख्याल:मि ख: । अपाय्सकं नांजा:म्ह ख्याल:मिलिसे ज्या याये खनीगु धइगु चानचुने खँ नं मखु । अनंलिपा श्रीकृष्ण अणुया मेमेगु ख्यालखय् नं म्हितल । सुरेन्द्रयात श्रीकृष्ण अणुया थाय् यंका ब्यूम्ह नं शुभरत्न हे जुयाच्वन । अय्जुया: सुरेन्द्रयात आ:तक नं शुभरत्नया गुण लुमंसे वयाच्वनीगु ।
सुरेन्द्रया मचाबलय्निसें हे हिन्दी फिल्म स्वयेगु बानी । खास याना: स्कूलं बिस्युं वना: रञ्जना हलय् फिल्म स्व: वनीगु । छेँ ध्वाखात्वा:: अले स्कूल यट्खाया श्रीकन्या माद्यमिक विद्यालय जूबलय् अनं सतिगु हल रञ्जनाय् आपालं फिल्म स्व:वनीगु मचाबलय्निसें । विश्वज्योति नं स्व:वनीगु । फिल्म स्वस्वं हे थुखेपाखे नुग: क्वसायावन । फिल्म धइगु छु ख: धइगु किे मास्ते वया वल । उकिसनं हनुमानध्वाखा, लाय्कू लागाय् शुटिङ्ग याइबलय् हिन्दी फिल्मया शुटिङ्ग नं खन । थुकथं हे वयागु नुग: थुखेपाखे क्वसाना वन ।
नेपालभाषाय् पलिस्थाया ख्याल: कासाय् थ:गु अभिनय क्यने खना: लय्ताया च्वंम्ह सुरेन्द्र तुलाधरया मनय् लिपा वना: थ:हे नं ब्वति कायेगु मति वन । अले मेगु दँय् थ:हे ब्वति कायेगु क्व:छित । तर ब्वति कायेत छुं छगू संस्था मा:गु जुयाच्वन । थ:गु संस्था धा:सा मदुगुलिं याना: थ: ब्वनाच्वनागु पब्लिक युथ क्याम्पसया सँझ्या: साहित्य पालापाखें ब्वति कायेगु मति तल । तर सँझ्या: साहित्य पाला:पाखें स्वीकृति काये थाकुल । छाय्धा:सां व पालापाखें दँय्दसं छधा:प्याखं कासा याना वयाच्वंगु । अले व कासाय् न्ह्याबलें सिरपा: नं त्याका वयाच्वंगु जुयाच्वन । उकें न्हूगु पुच: वना: मेपिन्थाय् ब्वति का: वनीबलय् बांमलात कि पा:लाया न्हाय् वनी धका: ग्याना: सुरेन्द्रया पुच:यात पलिस्थाय् ब्वति कायेत उजं मब्यूगु जुयाच्वन । तर सुरेन्द्रं सिरपा त्याका हयेगु हाथ्या स्वीकार यात । अझ ला वयात सिरपा त्याका महल धा:सा क्याम्पसय् दुकाय् मखु धका: तकं ख्याच्व: बिल, वं छगू हाथ्या ज्वना: ब्वति का: वन । उगु ख्याल:या नां “मिस्तय् आंग्सा” ख: । उगु ख्याल: पलिस्था ख्याल: कासाय् न्हाप हे लात । ख्याल: जक मखु निर्देशक तुलसीनारायण महर्जन, मिजं प्याखंम्व: जगत श्रेष्ठ व मिसा प्याखंम्व: नीना प्रधानाङ्ग तकं सिरपा: त्याकेत ता:लात ।
थ्व ‘मिस्तय् आंग्सा’ नांयागु ख्याल: धइगु सुरेन्द्रया च्वसां पिदंगु न्हापांगु प्याखं ख: । पुलांगु खँ लुमंकेगु झ्वलय् सुरेन्द्रं कन, “दकलय् न्हापां च्वये सिधयेका: ख्वपय् वना: रामशेखर दाईयात क्यने यंका । वय्कलं ब्वने धुंका: छुं छुं सुझाब बियादिल । थ्व ख्यालखय् यमन श्रेष्ठं संगीत त:गु ख: । थ्वहे झ्वलय् यमनया छेँय् वंगु इलय् यमनया अबुजु मदनकृष्ण श्रेष्ठजुं त:क्व:मछि नाप लात । “अले मदन दाई नं जिगु ख्याल: ब्वना दिल । ब्वने धुंका: जित: यक्व हे खँ कनादिल । स्यना दिल । उगु ख्यालखय् गुलि नं ख्यालिन्हिलिं जा:गु खँत दु, व दक्व मदन दाई नं सुझाव बियादीगु ख: ।’ धइगु खँ सुरेन्द्रं कन । कला ख्यलय् नुग: क्वसा:म्ह सुरेन्द्र तुलाधरं नेवा: संगीत ख्यलय् न्हापांगु सिरपा: ज्याझ्व: “न्यू ट्यालेन्ट नेपालभाषा म्यूजिक अवार्ड ग्वसा: ग्वया: छगू ज्व: मदुगु ज्या याना: नं क्यने धुंकल । थुगु ज्याझ्व:या निगूगु संस्करणकथं ‘द ट्यालेन्ट नेपालभाषा म्यूजिक अवार्ड’ नं जूगु ख: ।
सुरेन्द्रं ख्याल: व प्याखनय् यक्व हे ब्वति काल । थ्वहे झ्वलय् संस्कृतिविद् सत्यमोहन जोशीं च्वयादीगु “म्हगसय् नाप ला:म्ह” नांयागु प्याखं छगू म्हितेगु ह्व:ता: चूलात । थ्व प्याखंया निर्देशक प्रचण्ड मल्ल ख: । थुके वयात मन्त्रीया छगू चीधंगु रोल बिल । उके जुजु उदेनया रोलय् पुष्कर माथेमा म्हितीगु क्वछिना त:गु ख: । रिहर्सल शुरु जुल । तर प्याखं मञ्चन जुइ नीन्हुति न्ह्य: वया: पुष्कर पिने वनेमा:गु ज्यां याना: पिहां वनेमाल । हल नं बूक जुइधुंकल । अज्या:गु अवस्थाय् मेपिं म्हितीपिं माले नं थाकुल । “रोल नं ता:हाक: । डाइलग नं अप्व: । वहे प्याखनय् रवि महर्जन नं मन्त्री जुया: म्हितेत्यंगु खनिं । वयात हे जुजु जुइत इनाप यात । व माने मजू । मेपिं नं माने मजू । जित: नं धाल, जिं नं न्हापा ला म्हा’ धका: धया धका: सुरेन्द्रं कन । सुरेन्द्रयात व रोल यायेगु आँट ला मव:गु ख: तर उगु इलय् उगु प्याखं क्यने मफइगु अवस्था ब्वलंगुलिं याना: सत्यमोहन दाइ, प्रचण्ड दाइपिनिगु ख्वा: खिउँल । वय्क:पिनिगु ख्युं ख्वा: स्वयेमफया: सुरेन्द्रं वय्क:पिनिगु मन तयेत जूसां म्हितेगु आँट यात । निन्हुतक प्याखं ब्वन । अले डाइलग कण्ठ याना: न्यंकल । प्रचण्ड मल्लया ख्वा: चकन । सत्यमोहन दाइ नं ला ‘जिगु प्याखंया हिरो छ हे जुइमा:गु जुयाच्वन’ धका: धयादिल । अले आ:तक सुरेन्द्रयात वय्कलं अथे हे धका: सम्बोधन यायेगु यानावयाच्वंगु दु । म्हगसय् नापला:म्ह धुंका: सुरेन्द्रं “तथागत” नांयागु प्याखंया निर्देशन यायेगु भाला काल । प्रचण्ड मल्लं च्वयादीगु थ्व नाटक भगवान तथागत गौतम बुद्धया जीवनय् दयेकूगु नाटक ख: । “तथागत” धुंका: सुरेन्द्रया पला: प्याखंपाखें संकिपापाखे न्ह्यात । व पला: इमेज च्यानलय् क्यनावयाच्वंगु ‘ख्वताबजि’ जुया: पिदन । शुरुशुरुइ ला उके नं छम्ह कलाकार जुया: जक ब्वति का:गु ख: । लिपा वना छम्ह च्वमि जुया: नं ज्या यात । सह–निर्देशक नं जुल । १३ भागनिसें “ख्वताबजि’या च्वमि जुया: ज्या न्ह्याकूम्ह सुरेन्द्र तुलाधर लिपा ४०१ भागंनिसें निर्देशक जुया: पिहां वल । सुरेन्द्रं च्व:गु “ख्वताबजि”या दकलय् न्हापांगु प्याखं “पाहाँच:र्‍हेया पाहाँ” ख: ।
नेवा:तय् दथुइ तसकं लोकंह्वा:गु “ख्वताबजि”या लुखां आपालं नेवा: कलाकारत पिहां व:गु दु । पानवतीया हिरोनी सनम शाक्यनिसें कया: देविना महर्जन, अमिता जोशी, मञ्जु प्रजापति, भोगेन्द्र मानन्धर, रुमन जोशी, हरिमान दिवाक, मानकृष्ण वावा, राजु महर्जन थेंज्या:पिं आपालं कलाकारत “ख्वताबजि”या लुखां संकिपा ख्यलय् पिलूव:पिं ख:। “स्वयेगु मखुला” सिरियल दयेकूम्ह अमृतचन्द्र श्रेष्ठ, “फय्गं” सिरियलया सुरेश स्थापित, “बाखंचा”या उमेश स्थापितलगायत आपालं कलाक:मिपिं “ख्वताबजि” लिसे छगू इलय् स्वापू दुपिं ख: ।
आपा:सिनं नेवा: संकिपाया बजा: मदु । लाय् साले थाकु धका: धाइ तर सुरेन्द्र तुलाधरया धापूकथं संकिपा बांलाक्क दयेके ला मा:गु हे जुल धइगु खनेदुसा संकिपाया बजार ग्वसा: व प्रचारप्रसार नं बांलाक्क यायेमा: धइगु खनेदु । प्रचार नं गाक्क हे याये फत अले संकिपा नं बांलात धा:सा स्वकुमि अथें हे वइ धइगु खँया दसुकथं “थ्व ला ग्यानापु स्टाइल”यात कायेमा: धइगु खनेदु । छाय्धा:सां थ्व फिल्म छन्हुया दुने हे प्यंगू प्यंगू शो क्यनं नं स्वकुमित जायेक हलय् वल । अले छन्हुया दुने हे संकिपाया मू लाय् सालेत ता:ला:गु ख: । “पानबती” नं छगू अज्या:गु हे दसु ख: ।
सुरेन्द्र “ख्वताबजि” धुंका: “याक: म्ह्याय्”या च्वमि व सह–निर्देशक जुल । अले पासापिं मध्ये अमृतचन्द्र श्रेष्ठं वयात “अंश”या निर्देशक जुइत प्रस्ताव तल । थुकथं सुरेन्द्र तुलाधरया दकलय् न्हापांगु संकिपा “अंश” ख: । तर आ:तक पिमदंनि । आ: धा:सा याकनं हे पिदनेत्यंगु खँ सुरेन्द्र तुलाधरं कन सा थौंकन्हय् वय्क: निगू नेवा: फिल्म “छंगु नामय्” व “जि ला जेण्टलम्यान” दयेके ज्याय् लगे जुयाच्वंगु दु ।

More Stories Like this