सरकार व संविधानसभा कठपुतली : बादल
नेकपा–माओवादीया मूछ्याञ्जे रामबहादुर थापा ‘बादलं’ वर्तमान सरकार व संविधानसभा कठपुतली जूगुलिं जनताया पक्षय् संविधान दयेके मफइगु धयादीगु दु ।
नेपाल राष्ट्रिय दलित मुक्ति मोर्चां जनयुद्धया न्हापांम्ह शहीद दिलबहादुर रम्तेलया झिंगुक्वःगु स्मृति दिवसया लसताय् सम्वाद डबलिइ ग्वसाः ग्वःगु अन्तक्र्रिया ज्याझ्वलय् न्ववानादिसें मूछ्याञ्जे थापां सुगौली सन्धिलिपाया पराधिन सरकार व सदन थें हे आः नं प्रतिगामी व यथास्थितिबादी, आत्मसमपर्णबादीपिनिगु हाबी जूगु सरकार व संविधानसभा जूगुलिं जनताया पक्षय् ज्या यायेमफइगु दाबी यानादीगु दु ।
मूछ्याञ्जे थापां दिलबहादुर रम्तेलया बलिदानं नेपालय् राजतन्त्रया अन्त्य जुयाः गणतन्त्र पलिस्था जूगु धयादीगु खः । नेपाःया हिउपाःया नितिं द्वलंद्वः रम्तेलतय्सं बलिदान याःसां नं नेपाःमि नेतां थःगु बिचाःयात न्ह्यःने न्ह्याकेगु स्वयाः नं आत्मसमर्पण याःगुलिं उमिगु म्हगस पूवने मफुगु धयादीगु दु ।
ज्याझ्वलय् मोर्चाया नायः तिलक परियारं नेपाः व नेपाःमिया मुक्तिया नितिं रम्तेलया बलिदान जूगु धयादीगु दु । कांग्रेस निकट नेपाल दलित संघया मूछ्याञ्जे लक्ष्मी परियारं आन्दोलनय् दलिततय्गु बलिदान जूसां नं नेतातय्सं उकियात सम्मान यायेमफुगु धयादीगु दु ।
ज्याझ्वलय् केशबहादुर परियार, हस्तबहादुर केसी लगायतपिंसं दिलबहादुर रम्तेलया बलिदानया सम्मान यायेमाःगु खँय् बहः नापं बियादीगु दु ।
गोरखा पन्दु्रङ गाविसया मचा दिलबहादुर रम्तेलयात जनयुद्धया झ्वलय् २०५२ साल फागुन १४ गते तत्कालीन प्रहरीं स्याःगु खः । रम्तेल कक्षा ४ य् ब्वनाच्वंगु खः । शहीद दिवसया सन्दर्भय् एकीकृत माओवादीं कोटेश्वरसं च्वंगु पार्टी मू ज्याकुथिइ ज्याझ्वः ग्वसाः ग्वःगु खः ।
अथेहे नेकपा–माओवादीं नेवाः राज्य कुपण्डोलय् फागुन १४ गतेनिसें २२ गतेतक्क जुइगु शहीद सप्ताह ज्याझ्वःया नितिं शहीद, बेपत्ता व घाःपाः योद्धा लिसे छेँजःपिंत सम्मान यायेगु ज्याझ्वः दुगु जानकारी ब्यूगु खः ।
