प्राध्यापकतय्सं थौं नं बिल धर्ना

थीथी मागलिसे त्रिभुवन विश्वविद्यालय प्राध्यापक संघया न्ह्यलुवाय् धर्ना न्ह्याकूपिं विश्वविद्यालयया प्राध्यापकतय्सं थौं नं विश्वविद्यालयया मू ज्याकुथिइ धर्ना ब्यूगु दु ।

संघयापाखें २०६८ साल असोज ४ गते प्राध्यापकपिनिगु हकहितया सम्बन्धय् विश्वविद्यालयलिसे न्ह्यब्वःगु नीस्वंगू बुँदे माग जायज जूगु न्ह्यःथना विश्वविद्यालययापाखें लिखित प्रतिबद्धता क्यंसां नं आःतक्क कार्यान्वयन मजूगु न्ह्यःथना प्राध्यापकतय्सं धर्ना ब्यूगु खः ।

चरणबद्ध धर्नाया ज्याझ्वःकथं म्हिगः निघौ धर्ना ब्यूगुलिइ थौं सुथसिया झिताः इलंनिसें छताः ईतक्क यानाः स्वघौ धर्ना ब्यूगु संघया नायः योगेन्द्रनारायण बडवरियां धयादीगु खः । धर्ना ज्याझ्वः थ्वहे फागुन १६ गतेतक्क न्ह्याइगु वय्कलं न्ह्यःथनादीगु दु ।