नांजाःम्ह साहित्यकार माधवलाल कर्माचार्य मन्त
नांजाःम्ह वरिष्ठ साहित्यकार लिसे अनुवादक व सम्पादक माधवलाल कर्माचार्य च्यय्न्हय्दँया उमेरय् म्हिगः बहनी येँया स्टार अस्पतालय् प्वाःया अप्रेशन यायेगु झ्वलय् मन्त । वय्कः लच्छि न्ह्यःनिसे म्हं मफया च्वंगु खः ।
वय्कलं नेपालभाषा, नेपाली व अंग्रेजी भाषाय् साहित्य सम्बन्धी थीथी सफुत पिथनादीधुंकूगु दु । उकि मध्ये वय्कःया नेपालभाषाया आपालं नांजाःगु सफुत “लः फ्वः” व “जिगु मिखाय् साहित्य” लगायत दु । वय्कलं साहित्य ख्यलय् निरन्तर थःगु च्वसा न्ह्याकाः नेपाली साहित्य ख्यलय् मूवंगु योगदान बियादीगु दु ।
अबु शेरलाल कर्माचार्य व मां बद्रीनानी कर्माचार्यया कोखं नेपाल सम्वत् १०४७ सं येँया केल त्वालय् जन्म जुयादीम्ह वय्कः थौंकन्हय् यलया बखुण्डोलय् च्वना वयाच्वनादीगु खः । वय्कःया दाजु केशवलाल कर्माचार्य नं नांजाःम्ह बाखं च्वमि खः ।
पब्लिक एण्ड सोसियल एडमिनिस्टेड ब्वना नेपाल सरकार अन्तर्गत अफिसर सरह ज्या यानादीधुंकूम्ह कर्माचार्यया थौं हे सुथय् गुताः इलय् पशुपति आर्यघाटय् दाहसंस्कार याइगु ज्याझ्वः दुगु पारिवारिक श्रोतं जानकारी ब्यूगु खः ।
