थौं अन्तर्राष्ट्रिय मां भाय् दिवस
थौं अन्तर्राष्ट्रिय मां भाय् दिवस थीथी ज्याझ्वः यानाः हनेगु ज्या जुयाच्वंगु दु । संयुक्त राष्ट्रसंघया इनापय् सन् २००० निसें मां भाय् दिवस हनेगु ज्या न्ह्याःगु खः ।
सन् १९५२ सं तत्कालीन पूर्वी पाकिस्तान अन्तर्गतया बंगलादेशी विद्यार्थीतय्सं थःगु मां भाय् न्वंवाये दयेमाःगु माग याःगु इलय् दमन जूगु व उगु इलय् सीपिं विद्यार्थीपिनिगु लुमन्तिइ थ्व दिवस हनेगु ज्या जूगु खः ।
नेपालय् नं सच्छिगू स्वयां आपालं मां भाय् न्वंवायेगु याना वयाच्वंगु दु । हरेक समुदायसं न्वंवाइगु आपालं धइथे भाय् लोपोन्मुख अवस्थाय् दुगु न्ह्यःथना सरोकारवालापिंसं च्यूताः प्वंकेगु यानाच्वंगु दु ।
नेपाली भाषा सरकारी कामकाज व पठन पाठनया भाय् जूगु हुनिं धिसिलाःसां नं तुलनात्मक रुपं मेमेगु भाय् धाःसा लोप जुइगु अवस्थाय् थ्यंगु भाषाविद्पिनिगु धापू दु । मां भाय् संरक्षणया नितिं ज्या जुयाच्वंगु जूसां नं प्रभावकारी जुइफयाच्वंगु मदुनि । मां भाय् संरक्षण यायेगु नितिं पाठ्यपुस्तक दयेकाः हे प्राथमिक तहतक्क पठन पाठन न्ह्याकेमाःगु न्ह्यःथना सरकारया ध्यानाकर्षण याकेगु ज्या जूसां नं उगु अभियानं आःतक्क पूर्णता कायेफुगु अवस्था मदुनि ।
हलिमन्यंक न्हियान्हिथं धइथे आपालं भाय्त लोप जुइगु यानाच्वंगु दु । सञ्चार व विज्ञान प्रविधिया थीथी आयामं हलिं (विश्व) गां थें जूगु व गाँस, बास, कपास, स्वास्थ्य, शिक्षा व रोजगारीया नितिं हरेक मनुखं थःत अन्तर्राष्ट्रिय मापदण्डय् यंकेत स्वःगुलिं मनूतय्त मां भाय्या जगेर्नाय् आवश्यकता, रुची व ई म्हो जुजुं वनाच्वंगु दु ।
थज्याःगु हे थीथी खँयात बिचाः यानाः थनि न्हय्दँ न्ह्यः पलिस्था जूगु “नेवाः बस्ती नेवाः स्कूल अभियान” यात छगू धिसिलाःगु ज्याया रुपं झीसं कायेफु । थुगु अभियानया कजि भाजु दिपक तुलाधरं बियादीगु जानकारीकथं आःतक्क स्वनिगः व स्वनिगलं पिने यानाः नेपालभाषा विषय व नेपालभाषा माध्यमकथं ब्वँकीगु स्कूल सच्छि व च्यागू थ्यनेधुंकूगु दु । थुगु अभियानकथं अन्तर्राष्ट्रिय मां भाय् दिवसया लसताय् थ्व छगू नेवाःतय्गु नितिं धिसिलाःगु दसु जुयाब्यूगु खँ झीसं नालाः कायेफु ।
