एमालेया स्थायी कमिटी बैठकं न्वकु गौतमयात गृहमन्त्री दयेकेगुलिइ अडिग
गुक्वःगु महाधिवेशन बैशाखय्
नेकपा एमाले स्थायी कमिटीया बैठकं न्वकु बामदेव गौतमयात कांग्रेस नेतृत्वया सरकारय् गृहमन्त्री दयेकेगु निर्णयसं अडिग जुइगु निर्णय याःगु दु ।
सुशिल कोइराला नेतृत्वया सरकारय् न्वकु गौतमयात पार्टीयापाखें नेतृत्व याकेगु थ्व स्वयाः न्ह्यःया स्थायी कमिटीया निर्णय यथावत तयाः स्थायी कमिटीं न्हय्गू बुँदे सहमतिया अक्षरशः कार्यान्वयन जुइमाःगु अडान हाकनं लिसा काःगु खः ।
न्हूगु बानेश्वरसं च्वंगु संविधानसभा भवनय् च्वंगु स्थायी कमिटीया बैठकं शनिवाः च्वनीगु केन्द्रीय कमिटीया बैठकया नितिं एजेण्डा नं क्वःछ्यूगु दु ।
न्वकु गौतमयात सरकारय् छ्वयेगु विषयसं पार्टीया नेतात दथुइ मतभेद व कचवं दुगु खँ पिने वयेवं स्थायी कमिटी बैठकं उकिया बारे छु नं मतभेद मदुगु लिच्वः पिकाःगु छ्याञ्जे शंकर पोखरेलं जानकारी बियादीगु खः ।
न्वकु गौतमयात गृहमन्त्री जुइगुपाखें पनेत पार्टीया हे सुं सुं जिम्मेवार नेतापिं न्ह्यःज्यानाच्वंगु खँ सञ्चार माध्यमय् सार्वजनिक जुयाच्वंगु इलय् स्थायी कमिटीया बैठकय् गौतमयात सरकारय् छ्वयेगु निर्णय बारे नेतातय्सं एकमत दुगु न्ह्यःथंगु दु ।
अथेहे पार्टीया गुक्वःगु महाधिवेशनया तिथि बैशाखं मयासे लिछ्वयेगु लिच्वः स्थायी कमिटी बैठकं पिकाःगु दु । लच्छि न्ह्यः च्वंगु स्थायी कमिटी बैठकं बैशाख ९ गतेनिसें येँय् गुक्वःगु महाधिवेशन यायेगु निर्णय याःगु खः ।
शनिवाः च्वनीगु केन्द्रीय कमिटीया बैठकय् महाधिवेशन पार्टीया तत्कालीन मूछ्याञ्जे मदन भण्डारी व संगठन विभाग प्रमुख जीवराज आश्रितया स्मृति दिवस जेठ ३ गते उलेज्या यायेगु प्रस्ताव यंकेगु लिच्वः स्थायी कमिटीं पिकाःगु दु ।
एमालेदुने पार्टीया गुक्वःगु महाधिवेशन न्ह्यः देशय् स्थानीय निकायया चुनाव यायेमाःगु सः सशक्त जुजुं वंगु दु । न्हापां स्थानीय निकायया चुनाव यानाः जक पार्टीया महाधिवेशन यायेत कार्यकर्तापाखें नं दवाब वयेवं महाधिवेशनया तिथि लिछ्यायेगु लिच्वलय् एमाले थ्यंगु खः ।
शनिवाः च्वनीगु केन्द्रीय कमिटी बैठकं महाधिवेशन बारे बामदेव गौतमया कजित्वय् विधान मस्यौदा समिति नीस्वने धुंकूगु दु ।
