भर्सटाइल एक्टर स्वतन्त्र

स्वतन्त्र संसार महर्जन छम्ह लोकंह्वा:म्ह नेवा: हिरो ख: । “निफ्व:स्वां” नांयागु नेवा: संकिपाया लुखां थ्व ख्यलय् दुहाँ व:म्ह स्वतन्त्र संसार महर्जनं आ:तकया दुने निफ्व:स्वां, ए.... जि य:म्ह, जिपिं बदमाश मखु, थ्व जिगु नुग:, मिखा दुम्ह कां, माया, धा:सा पत्या: मजू, इहिपा लगायत छगू दर्जनं मल्याक संकिपाय् थीथी भूमिकाय् थ:गु अभिनय न्ह्यब्वय् धुंकल । थुकी मध्ये गुलिखे संकिपाय् हिरो हे जुया: म्हिताल । छुं छुं संकिपाय् पाहाँ कलाकारकथं जक नं ख्वा: ब्वल । अले “इहिपा”नांयागु छगू संकिपाय् नेगेटिभ रोल हे जूसां मेनरोल म्हिा थ: छम्ह ‘भर्सटाइल’ कलाकार ख: धका: क्यने धुंकल । वय्क:भाजु अभिनयया खँय् जक भर्सटाइल मखसें प्रतिभाय् नं बहुप्रतिभा दुम्ह कलाकार ख: । अले थ:गु प्रतिभा ब्वयेगु झ्वलय् वय्क: भाजुं संकिपाय् हुलाप्याखं स्यनामि (कोरियोग्राफर), ल्वापुख्यापु स्यनामि (एक्सन को–अर्डिनेटर) जुया: नं ज्या याये धुंकलसा ‘ए... जि य:म्ह, पिया चोना व हसना नांयागु स्वंगू संकिपाया निर्देशन नं यायेधुंकल ।

थुकथं बहुप्रतिभाया धनीया रुपय् थ:गु म्हसिका न्ह्यब्वयेधुंकूम्ह स्वतन्त्र संसार महर्जनं थ: निगू तगिमय् आख: ब्वनाच्वंगु इलय् हे ‘सुदन कुमार’ नांयागु छगू दबू प्याखनय् छम्ह गरिबम्ह मचाया रोल या:गु ख: । उगु इलय् वयागु अभिनय थुलि ता:लात कि अन दबू प्याखं स्वयाच्वंपिं सकल स्वकुमितय्गु नुग: ख्वयेका बिल । कलाकारिता वयागु पारिवारिक देन धका: धा:सां पाइमखु । छाय्धा:सां स्वतन्त्रया अबुजु तेजकुमार महर्जन नं थ:गु ईया छम्ह तसकं लोकंह्वा:म्ह कलाकार ख: । अबुजुया ह:पा: दया: हे स्वतन्त्र थ: स्वतन्त्ररुपं कलाकारिता ख्यलय् न्ह्या: वनेफुगु ख: । वयात मचाबलय् खोनाया बागमति खुसिइ यंकाm लाल कायेगु स्यंम्ह नं वया थ: हे अबु ख: । उलि जक मखसें वयात जिम्नास्टिक, हाइजम्प, लंग जम्प नं वया अबुजुं हे स्यंगु ख: । स्वतन्त्रया दाजु छम्ह नं दु, पवित्र कुमार महर्जन । दाजुम्ह नं कला ख्यलय् नुग: क्वसा:म्ह हे व्यक्तित्व ख: । न्हापा थीथी एफएमय् नेवा: ज्याझ्व:तकं न्ह्याके धुंकूम्ह पवित्र छम्ह नाटक निर्देहक नं ख: । दाजु पवित्रं निर्देशन या:गु आपालं नाटकय् स्वतन्त्रं हिरो जुया: म्हितूगु दु । आख:, मनूया मिखा, कर्तव्य, ध्वगिगु समाज, आसांद्या:म्ह मिसा, अज्या:गु हे छुं छुं प्याखंया नां ख:, गुगु प्याखंत स्वतन्त्र म्हितल अले वया दाजु पवित्रं स्यन । अर्थात् निर्देशन यात ।

दाजुम्ह निर्देशक अले किजा कलाकार जूगुलिं खानाय् इमित तुलसि घिमिरे व श्रवण घिमिरे धका: तकं धाइगु । खोनाय् जुइगु थीथी सांस्कृतिक ज्याझ्वलय् स्वतन्त्र संसार महर्जन छम्ह अनिवार्यकथं दया हे च्वनीगु । मदइगु नं गनं मचांनिसें न्ह्या:गु वयागु कलाकारिताया पलाखय् वयात अबुजु व दाजुया जक साथ दुगु मखसें जीवनपासातकं वयात वहे ख्यलय् चूला:गु ख: । झिन्यादँ झिंखुदँया नच्चागु वैशय् दबू प्याखनय् हिरो जुया: म्हितेगु सुरु या:म्ह स्वतन्त्रया गुलिखे प्याखनय् प्रेमशोभा नांयाम्ह छम्ह ल्यासे हिरोइन जुइगु । प्रेमशोभा नं नृत्य कलापाखे नुग: क्वसा:म्ह ख: । नृत्यय् निपुणम्ह ख: । नापनापं प्याखनय् म्हितूबलय् इमि नुगलय् मतिनाया स्वां नं ह्वल । तर उमेरं मगानिगुलिं याना: झिन्यादँतक पिइमाल । उकें हे गबलें गबलें स्वतन्त्रयात वया तिरिमय्जु प्रेमशोभां थथे नं धाइगु हँ, ‘महाद्य:लिसे ब्याहा याये दयेमा धका: पार्वतीं च्वंगु तपस्यासिबें जिं छंगु लागि च्वनागु झिन्यादँतकया तपस्या नं छु कम धका †’

मचाबलय् निसें कलाकारिता ख्यलय् नुग: क्वसायेका वयाच्वंम्ह स्वतन्त्रयात जीवन पासा नं थ्व ख्यलय् मतिना दुम्ह हे लात । स्वतन्त्रयात वयागु कलाकारिता ख्यलय् सदां साथ नं बिल । वयागु दकलय् न्हापांगु संकिपा ‘निफ्व:स्वां’ दयेकूगु इलय् प्रेमां (प्रेमशोभायात स्वतन्त्रं प्रेमा धका: स:तिगु जुयाच्वन ।) छम्ह ड्ेरस डिजायनर अले हेयर ड्ेरसर जुया: ग्वाहालि यात । एम्स मुभिज धका: छगू कम्पनी नीस्वना: न्ह्याकूगु थ्व पलाखय् लिपा “ए... जि य:म्ह” नांयागु फिल्म तँसा जुया वल । थ्व कम्पनी नीस्वनेत स्वतन्त्रयात विनेभानन्द वैद्य व परमेश्वर नारायण जोशीलगायत आपालं पासापिसं ग्वाहालि यात । पासापिं व परिवारं तिब: ब्यूगुलिं हे थ: थुकथं छम्ह कलाकारकथं धस्वाये फुगु ख: धका: धाइम्ह स्वतन्त्र संसार महर्जनं थ:गु संकिपा अभिनय जीवनया न्हापांगु पला: लुमंके झ्वलय् ‘निफ्व:स्वां’या न्हापांगु न्हिया शुटिंगया ई लुमंकल । स्वतन्त्र धा:कथं न्हापांगु शुटिंग खोनाया कार्यविनायकया देग: दुने जूगु ख: । अन गीता शाहीलिसे इहिपाया लू शुटिंग जूगु ख: । शुटिंग जक जूसां अन तयारी धा:सा धात्थेंया इहिपासिबें कम मजू धका: स्वतन्त्रं कन । गुरुजु धात्थेंम्ह । छेँज:पिं धात्थेंपिं । पाहाँपिं धात्थेंपिं । इहिपाया हलंज्वलं धात्थें यागु । अन ब्वंगु मन्त्र नं धात्थें या:गु । उलिमछि जूबलय् ला स्वतन्त्रयात छक्व:ला तसकं हे मछिना वल हँ । “तर शुटिंग नि ख: नि धका: मति तया ।” धका: स्वतन्त्रं धाल । संजोग ला छु धा:सां उगु इलय् शुटिंगया ज्याक:मि जुया: ज्या यानाच्वंपिं सकलें लिपा स्वतन्त्रया धात्थेंया इहिपा बले न्हापा गथे अथे हे वया न्ह्य:ने लिउने दना च्वन । दयेत ला क्यामेरा नं दु तर शुटिंगया मखु । सकली इहिपाया लूयात क्यामेरा दुने स्वथना च्वन ।

स्वतन्त्रयात स्वयेबलय् न्ह्याम्हं ल्यासेतय्त झुमिं यंकेगु ताकत दु । तर वयात धा:सा प्रेमाया मतिनां चित । इमि य:त्य:या स्वाहाने गयाच्वंगु इलय् नं स्वतन्त्रयात प्रपोज या:व:पिं मेपिं मदुगु मखु, दु । तर स्वतन्त्रयात अज्या:गु इनापं बिचलित मया: । छाय्धा:सां प्रेमालिसेया वयागु मतिना पवित्र मतिना ख: ।

स्वतन्त्रयाके त:ताजि प्रतिभा दु । तर छु नं तालिम वा अध्ययनं सयेकूगु मखु । थ:गु जीवनय् थ: अबु छम्ह बाहेक मेम्ह गुरु मदु धका: धाइम्ह स्वतन्त्रं टेलिभिजनय् वइगु गीतान्जली, प्रतिभाको दबली थेंज्या:गु आपालं प्रोग्राम स्वया: कलाया ज्ञां लाना का:गु ख:सा लिपा वना: थ: स्वयम् नं अज्या:गु ज्याझ्व:या निर्णायकतकं जुल । इमेज च्यानलय् वइगु “प्रतिभा दबू” छगू अज्या:गु हे ज्याझ्व: ख: । गुकि स्वतन्त्रं छम्ह निर्णायक जूगु ख: । “जि गुरु जुइ नं, गुबलें चेला जुइ मनं” धका: धाइम्ह स्वतन्त्र थौंकन्हय् कलिउड धका: धाइगु खस नेपाली फिल्मय् पला: न्ह्याकेगु ग्वसा: ग्वयाच्वंगु दु । थौंसिबें प्यदँति न्ह्य: “कृश र कोहिनूर” नांयागु छगू खस भाय्या संकिपा दयेकेगु ग्वसा: ग्वल । तर ता:मलात । थौंकन्हय् “रणवीर” नांयागु फिल्म दयेकेगु ग्वसा: दु, स्वतन्त्रया । थुकिया निर्देशनया भाला नेपा:या नांजा:म्ह फाइट डाइरेक्टर राजेन्द्र खड्गीयात ब्यूगु दुसा स्वतन्त्र थ: नं निर्देशनया पुचलय् च्वना: ज्या यायेत्यंगु दु ।

स्वतन्त्रया मू लजगा: धइगु ग्राफिक्स डिजायन व प्रिन्टिङ्ग ख: । थौंकन्हय् वयागु प्रिन्टिङ्ग प्रेसय् “तोरी लाहुरे” नांयागु कलिउड फिल्मया टि–शर्टत छापे यायेगु ज्या जुयाच्वंगु दु । थ:गु लजगा: बाहेक वयागु नुग: थौंकन्हय् सामाजिक सेवानं क्वसायाच्वंगु दु । थ्वहे झ्वलय् थुगुसी स्वतन्त्रं थ:गु बुदिं आर्दश सौल उच्च माध्यमिक विद्यालय, अपाङ्ग सेवा संघ खोनाया असक्त मस्तय् दथुइ हंगु ख:सा इमिगु निंतिं नं ग्वाहालि जुइकथं थ:गु संकिपाया च्यारिटी शोतकं यायेधुंकूगु दु । मनय् सेवा भावया स्वां ह्वल कि व झन् झन् तफ्व: जुया वनी धइगु खँ स्वतन्त्रं पुष्टि या:गु दु । छाय्धा:सां स्वतन्त्र थौंकन्हय् सानेपाया मेघा हस्पिटलया प्रमोटिङ्ग मेनेजर जुया: नं ज्या यानाच्वंगु दु । व नं लजगा:कथं मखु, सेवा भावं यानाच्वंगु दु । अले थ्व अस्पतालय् नेपा:या सकल कलाकारतय्त स्वास्थ्य परीक्षण व उपचारय् न्यय्ब्वतक छ्यापं बिइगु मति नं तयाच्वंगु दु । थुकथं स्वतन्त्र संसार महर्जन छम्ह कलाकार जक मखसें थौंकन्हय् छम्ह समाजसेव्या रुपय् नं थ:गु पला: न्ह्याकाच्वंगु दु ।

More Stories Like this