जय श्री संगीत समाजया ज्व:मदुगु ज्याझ्व:

‘जय श्री संगीत धइगु मू नारा बिया: जिमिसं थुगु संस्था स्वनागु ख: । थौंया थ्व गरिमामय सभाय् मित्रराष्ट्र भारतया विश्वविख्यात पण्डित हरिप्रसाद चौरसियाजु व जिमि गुरु हनेबह:म्ह रविन्द्रलाल श्रेष्ठजुया प्रस्तुति स्वये खंबलय् जिं थ:त तसकं गौरव महसुस यानाच्वनागु दु । शास्त्रीय संगीतयात व्यवसायीकरण यायेमा: धइगु आज्जु ज्वना: जिमिसं थुगु संस्था नीस्वनागु ख: ।’ थुगु धापू ख: जय श्री संगीत समाजया नाय: सुन्दर उदास तुलाधरया ।
झिदँ लिपा नेपालय् थ:गु बाँसुरीया धून न्ह्यब्वयेत झा:म्ह विश्वविख्यात बाँसुरी वादक हरिप्रसाद चौरसियाया शास्त्रीय संगीत वादन ज्याझ्व: स्वयेत नेपाल प्रज्ञा प्रतिष्ठानय् व:पिं संगीतप्रेमीपिन्त लसकुस यासें वय्कलं थुगु खँ धयादीगु ख: ।
निदँ न्ह्य: कलाकारिताया प्रदर्शन याना: कलाकारपिनिगु सम्मान व ल्याय्म्हपिन्त संगीतया महत्वबारे ज्ञान बीगु आज्जुं नीस्वंगु समाजं थ:गु स्थापनानिसें थौंतक थीथी ज्याझ्व:त न्ह्यब्वया वयाच्वंगु दु ।
२०६८ सालं गुरु पुन्हिया लसताय् रसियन कल्चर सेन्टरय् विविध शास्त्रीय संगीतया ज्याझ्व: या:गु समाजं उगु हे दँ अन्तर्राष्ट्रिय युवा दिवसया लसताय् नं शास्त्रीय संगीतया ज्याझ्व: ग्वसा:ग्व:गु ख: । २०६८ फागुन ६ गते समाजं न्हापां खुसी वृहत शास्त्रीय संगीतया ज्याझ्व: राष्ट्रिय नाचघरया सभाकक्षय् सरोद वादनया ज्याझ्व: या:गु ख:सा थगुने फागुन १२ गते सितार वादनया ज्याझ्व: या:गु ख: । २०७० जेठ ३१ गते भुटानी म्ये हालामी मधुकर लोहनीया एकल सांगीतिक साँझ ग्वसा:ग्व:गु समाजं लिपांगु ज्याझ्व: कथं हरिप्रसाद चौरसियाया बाँसुरी वादन ज्याझ्व: न्ह्यब्व:गु ख: । वय्क:यात नेपा:या नांजा:म्ह तबला वादक रविनलाल श्रेष्ठं तबलाय् संगत यानादीगु ख: ।
लसकुस न्वचु बियादीम्ह नाय: तुलाधरं लिपा लिपा नं समाजं थुज्व:गु हे स्तरया ज्याझ्व:त पित बीगु जानकारी बियादिल ।
नेपा:या निंतिं भारतया राजदूत रणजित रायया मूपाहाँसुइ जूगु ज्याझ्वलय् नेपा:या नांजा:म्ह संगीतकार अम्बर गुरुङ्ग नं पाहाँकथं झायादीगु ख:सा वय्क:पिं निम्हसिनं मंका:कथं त्वा:देवाय् मत च्याका: ज्याझ्व:या उलेज्या यानादीगु ख: ।
ज्याझ्व:यात सम्बोधनयासें राजदूत रायं धयादिल, ‘जय श्री संगीत समाजं दच्छिइ छक्व: थुज्व:गु शास्त्रीय संगीतया ज्याझ्व: ग्वसा: ग्वयेगु यानावयाच्वंगु दु । तर जिं इनाप याये थुज्व:गु ज्याझ्व: दच्छिइ छक: मखु स्वलाय् छक: यानादिसँ । मनूतय्सं धाइ कि शास्त्रीय संगीत न्यनीपिं यक्व मदु, तर थन उपस्थित स्वकुमिपिनिगु ल्या: स्वयेबलय् थ्व खँ सत्य मखु । येँयापिं शास्त्रीय संगीत न्यने चाहे जू । झीसं गुलि शास्त्रीय संगीत न्ह्यब्वल उलि थुकिया लोकप्रियता नं अप्वइ ।’
वय्कलं धयादिल, ‘शास्त्रीय संगीत झीगु सांस्कृतिक सम्पदा ख: । ल्याय्म्ह पुस्तायाके थुगु संगीतप्रतिया रुची जागृत यायेमा:गु दु । भारतय् जिं खना कि यक्व विश्वविद्यालयय् शास्त्रीय संगीतया नियमित ज्याझ्व: जुइगु या: । अले भारतया नांजा:पिं संगीतज्ञपिसं थुज्व:गु ज्याझ्वलय् ब्वति कायेगु यानादी । वय्क:पिसं कलेजय् ब्वनाच्वंपिंत शास्त्रीय संगीतय् न्ह्यज्यायेत उत्प्रेरित यायेगु ज्या यानादी ।’
वय्कलं धयादिल, ‘थौं झीसं गुम्हसित न्यनेत्यना, वय्क: छम्ह भारतया दकलय् प्रतिष्ठितपिं मध्ये छम्ह पं. हरिप्रसाद चौरसिया, गुम्ह केवल भारतय् जक मखु विश्वं हे वय्क:यात बांलाक्क म्हस्यू ।’
वय्कलं अन्तय् धयादिल, ‘भारतीय दूतावासं हर सम्भव पला: ल्ह्वनेगु जुइ, गुकिं निगुलिं देय्या सांगितिक सम्बन्ध ख: उकियात अझ अप्व: प्रगाढ दयेके फइ ।’
पं. हरिप्रसाद चौरसियां राग मधुवन्ती पुया: न्ह्याकूगु ज्याझ्वलय् रविन्द्रलाल श्रेष्ठं तबलाय् संगत यानादीगु ख:सा पं. चौरसियालिसें झा:पिं सुनिल श्रेष्ठ, देबोप्रिया रनजित चटर्जी व अमृता उप्रेतीपिसं बाँसुरी पुया: ग्वाहालि यानादीगु ख: ।
निगू सत्रय् न्ह्या:गु ज्याझ्वलय् निगूगु सत्रय् नेपा:या कलाकारपिं तबलाय् रविनलाल श्रेष्ठ व विजय लाल श्रेष्ठ, धोलकय् बाबुराजा महर्जन, खिं रमेश डंगोल, धिमे लक्ष्मीप्रसाद डंगोल, मादल नरेश प्रजापति, जिम्बे शम्भु वानियाँ थाना: रिदमिक जाम सत्र न्ह्याकूगु ख: ।
मय्जु प्रमिला मानन्धरं न्ह्यइपुक न्ह्याकूगु ज्याझ्व:या निंतिं नेपा: म्यूजिक, बीपी कोइराला इण्डिया–नेपाल फाउण्डेशन, नेपाल टेलिकम व समिट होटलं ग्वाहालि या:गु ख: ।

More Stories Like this