मुक्कं मानन्धर नेवाःतय् बस्ती क्याक्मी
कृष्ण प्रजापती
स्याङ्जा जिल्लाया क्याक्मी गाविस छगू थज्याःगु अजु चायेपुगु गाविस खः, गन मुक्कं मानन्धर समुदाय नेवाःत जक बसोबास यानाच्वंगु दु । आः तक मेगु जाति नापं उमिगु इहिपाः जूगु रेर्कर्ड तकं मदुगु गाविस सचिवं कनादिल । अन गाविस न्यकं निसःत्या परिवारय् झिंस्वसःया ल्याखय् नेवाः मानन्धरत दु । उकि फुक्कं हे धइथें मिजंतय् नांया लिउनेपाखें नारायण-नारायण धकाः तयातःगु दइ । मिस्तय् नांया लिउने धाःसा कुमारी मतसें मगाः । नचाबलय् हे इहिपा जुइपिं अनया न्हूपिं मिस्तय् नां आधुनिक दु, तर कुमारी तयेगु त्वफिइकूगु धाःसा मदु । र्इमर्जेन्सीकुमारी मानन्धर, ए्क्सिडेण्टकुमारी मानन्धर, एक्सनकुमारी मानन्धर छुं न्हूपि मिसामस्तय् नां खः । थन ख्वप, यल व किपूं वःपिं नेवाः मानन्धरतय् बसोबास जूगु खः धाइ ।
मनू सित धाःसा प्यघौ न्यासि वनेमाःगु कालीगण्डकी खुसि यंकाः हे जक उइ । अनया नेवाः मानन्धरत फुक्कं हिन्दू धर्म माने याइपिं खः । नासः पूजा याइबलय् नासः द्यइके वने वा, नासः द्यइके वने वा धकाः हालीगु म्ये आः नं दनि । थन कय्ता पूजा याइबलय् सा म्ये चिइगु डाम्लेखं उम्ह कय्ता बीम्ह मचायात गोठय् यंका चिनाः घाँय् तयाः पाजुम्हेसिनं सँ खाकीगु चलन दु । मिसा मस्तय्त इहि व बाह्रा तयेगु चलन दु । थःपिं नेवाः खः धइगु आपालं मानन्धर समुदायनं मसिउनि । लाहुर वनेगु व बुंज्या हे थनया प्रमुख पेशा खः । थन छुं दँ न्ह्यःतक नं छवाः बिकाः बटौली धाःगु बुटवलं चि चिकं हयाः आपूर्ति यानाच्वंगु खःसा खच्चरया चलन आः नं दनि । भिमादं प्यघौ फोर स्टुक गाडी गयेवं बल्ल क्याक्मीइ थ्यंकेफइ ।
