सहमति जुइमफयेवं आः बहुमतीय प्रक्रियापाखें सभामुख ल्यइगु
सहमतिया आधारय् सभामुख ल्ययेगु बिषयसं दलत दथुइ सहमति मजुइवं आः बहुमतीय प्रक्रियापाखें ल्यइगु जूगु दु ।
सभामुखया नितिं सहमति चूलाये मफयेवं थौं निताः ईतक्क नां दर्ता यायेत संविधानसभा सचिवालयं पिकाःगु सुचंकथं सुनां नं उम्मेदवारी दर्ता याःगु मदु ।
संविधानसभा सचिवालयं पिकाःगु सभामुखया निर्वाचन ज्याझ्वलय् थौं छताः इलंनिसें निताः ईतक्क सहमतिया आधारय् सभामुखया नां न्ह्यःब्वयेत धयातःगु खः ।
दलतय्सं सहमतिया नां न्ह्यःब्वये मफयेवं कन्हय् न्हिनय् बहुमतीय आधारय् उम्मेदवारी दर्ता यायेगु व सनिलया न्याताः इलय् चुनाव यायेगु धलः दयेकुगु दु ।
संविधानसभाया नायःया नितिं एमाले व एकीकृत नेकपा माओवादीं दाबेदारी न्ह्यब्वःगु दु । एमालेया म्हिगः चवंगु स्थायी समितिया बैठकं नेता सुभाष नेम्वाङ्गयात सभामुखया उम्मेदवार दयेकेगु औपचारिक निर्णय यायेधुंकूगु दु ।
एकीकृत नेकपा माओवादीं धाःसा नेता कृष्णबहादुर महरायात सभामुखया उम्मेदवार दयेकेगु तयारी याःगु दु । स्वंगूगु तःधंगु दलया हैसियतं सभामुख दयेमाःगु एकीकृत नेकपा माओवादीया दाबी दु ।
