वायुसेवा निगमया विमान स्वापू विहीन, झिंच्याम्ह बेपत्ता

येँपाखें पोखरा जुयाः जुम्लाया नितिं ब्वःगु नेपाल वायुसेवा निगमया ९ एन एबीबी ट्विनअटर जहाज स्वापू विहीन जूगु दु । विमान अर्घाखाँचीया खिदिमय् दुर्घटना जूगु शंका याःगु जूसां नं लुयाःवःगु मदुनि ।

विमानस्थल टावर श्रोतं खिदिमया जंगलय् विमान जूगु न्ह्यःथंगु खः । घटना जुइवं प्रहरीं खिदिमया ढावा, मालिका देगः, हर्राबोट लगायतया थासय् थ्यंगु खः । तर, छु नं विमान दुर्घटना जूगु लुयाःमवःगु जिल्ला प्रहरी ज्याकू अर्घाखाँचीं जानकारी ब्यूगु खः । नेपाली सेनाया हेलिकोप्टर नं उद्दारया नितिं वंगु दु । तर मौसम खराबीया हुनिं घटना जूगु धयातःगु थासय् थ्यंकेमफुनीगु जानकारी ब्यूगु खः ।

विमानय् चालक दलया स्वम्ह दुजः व झिंन्याम्ह यात्रुत दुगु खः । झिंन्याम्ह यात्रु मध्ये छम्ह मचा नं दुगु खःसा बेपत्ता जूगु विमानय् पाइलट शंकर श्रेष्ठ, कोपाइलट रबिन्द्र बञ्जारा व एयरहोस्टेज मय्जु मुना महर्जन दुगु जानकारी ब्यूगु खः ।

विमानमय नन्दा महतारा व वय्कःया जहान टेकबहादुर महतारा, जिल्ला हुलाक ज्याकू जुम्लायया निमित्त प्रमुख उमा तामाङ्ग, राजन चौंलागाई, बबरजङ्ग शाही, वर्षा हमाल व वय्कःया काय् दिप हमाल दुगु न्ह्यःथंगु खः ।

अथेहे कर्णाली स्वास्थ्य विज्ञान प्रतिष्ठानया मेडिकल डाइरेक्टर डा.बिकल्प पोखरेल, नेपाली सेनाया २४ नम्बर बाहिनीया मेजर
दीपक श्रेष्ठ, कृषि विकास बैंक जुम्लाया म्यानेजर राजेन्द्र देवकोटा, रेडियो नारी आवाजया नकिं गौरी कठायत, नेपाली कांग्रेस जुम्लाया सभापति मानव सेजुवाल, कृष्णनाथ योगी, डीपी उपाध्याय व मेम्ह छम्ह डेनमार्कया पर्यटक दुगु खः ।

पोखराय् इन्धन जायेकाः १२ : ४० सं ब्वःगु विमानं लिपांगु खुसिइ पोखरा टावरलिसे छताः ई जुयाः खुगू मिनेटय् स्वापू तःगु खः । येँलिसे खुगू मिनेट व भैरहवा टावरलिसे निताः ई जुयाः झिंस्वंगू मिनेटय् स्वापू तःगु जूसां नं खँल्हाबल्हा जुइमखंगु न्ह्यःथंगु खः ।

स्वापू त्वाःदले न्ह्यःतक्क जहाज झिद्वः व न्यासः फिटया उचाइसं दुगु विमानस्थल श्रोतं न्ह्यःथंगु खm । विमान जुम्लाय् जःछिपाः निताः इलय् (पौने २ बजे) हे अवतरण जुइमाःगु खः ।