अपराध नियन्त्रणया नितिं रमेश खरेलया १० बुँदा

येँया डनयात ज्वनाः छक्वलं हुइनाभुइना वःम्ह हनुमानढोका प्रहरी प्रमुख रमेश खरेलं अपराधा नियन्त्रणया नितिं झिगू बुँदा सार्वजनिक यानादीगु दु । महानगरीय प्रहरी परिसर हनुमानढोकाय् पत्रकार सम्मेलनया ग्वसाः ग्वयाः अपराध नियन्त्रण यायेत झिगू बुँदाया निर्देशिका न्ह्यःने न्ह्याकूगु दु ।

खरेलपाखें सार्वजनिक याःगु निर्देशिकाय् प्रहरीया आचरण लिसे व्यवहारय् सुधार हयेगु व प्रहरी स्वयं समस्याया कारक मजूसे रोल मोडल जुया ज्या यायेगु, गुण्डागर्डी, बिस्युं वनाच्वंपिं अभियुक्त व दण्ड सजाँय क्वःछिनातःपिं अपराधीतय्त धिसिलाक्क ज्वनाः कानुनी दायराय् हयेगु लिसे कैद मुक्त जूपिं व्यक्ति उपर निगरानी तयेगु लिसे भ्रष्टाचार व दण्डहिनता विरुद्ध शून्य सहनशिलतायात नीतियात अवलम्बन यानाः ज्या यायेगु खँ उगु बुँदाय् न्ह्यःथनातःगु खः ।

अथेहे वैज्ञानिक साधनया छ्यलायात प्राथामिकतालिसे अवलम्बन यानाः वनेगु, स्थानीय सामुदायीक केन्द्र लिसे थीथी संघ÷संस्थातलिसे नाप समन्वय लिसे सहकार्य यानाः चुस्त व धिसिलाःगु सजाँय स्थापना यायेगु, सामाजिक विकृति, जूम्हितेगु, वेश्यावृत्ति, दुव्र्यवहार थेंज्याःगु अनैतिक क्रियाकलाप नियन्त्रण यायेत कडा रुपं न्ह्यःज्यायेगु, दलाल, अपराधी, भ्रष्टाचारी लिसे दुई नम्बरी व्यक्तिपिंलिसे उठबस, सम्पर्क व सम्बन्धपाखें पूर्ण रुपं ताःपाक्क च्वनेगु लगायत दु ।

खुयाः कायेगु, लुटपाट लिसे डकैती न्यूनीकरण यायेगु नितिं प्रहरी परिचालनय् व्यापकता, इलय् ब्यलय् नागरिक समाजलिसे शान्ति सुरक्षा लगायतया क्षेत्र कःघायेगु कथं अन्तक्र्रिया ज्याझ्वः तयेगु लिसे प्रहरीया काम कारबाही बारे पृष्ठपोषण कायेगु व दुगु नीति निर्देशनया पालनापाखें वःगु प्रतिफल कथं प्रहरी कर्मचारीतय्त सिरपा लिसे दण्ड सजाँयया व्यवस्था यायेगु वय्कलं निर्देशिकाय् न्ह्यःथनादीगु खः ।