इलय् संविधान वयेगु खँय् शंका : दाहाल
एकीकृत नेकपा माओवादीया नायः पुष्पकमल दाहालं कांग्रेस एमालेया हे हुनिं आःया संविधानसभापाखें नं संविधान पिहाँ वयेमफइगु धयादीगु दु । पार्टी ज्याकू कोटेश्वरय् थौं ग्वसाः ग्वःगु ज्याझ्वलय् न्ववानादिसें वय्कलं थःपिं धाःसा दच्छिदुने संविधान पिकायेगु नितिं प्रयत्नशील दुसां नं कांग्रेस एमालेया पदीय भागबण्डाय् खनेदुगु कचवंपाखें जनचाहना कथंया संविधान दयेकीगु खँय् शंका यानादीगु दु ।
नायः दाहालं छगू मन्त्रालयया विषयसं कचवं याइगु निगू तःधंगु दलं खुलायादुने संविधानया मस्यौदा तयार यानाः इलय् हे संविधान बीगु लकस दयेकेगु खँय् विश्वास यायेमफइगु धयादीगु खः ।
दाहालं आःया संविधानसभा राष्ट्रिय पञ्चायतया थेंज्याःगु खनेदुगु बिचाः प्वंकादिसें थन हे च्वना संघीय संविधान दयेकेगु नितिं वनेमाःगु बाध्यता दुगु बिचाः प्वंकादीगु दु । संघीय संविधान दयेकेत मुद्दा मिलय् जूपिनिगु दथुइ एकता जुइमाःगु वय्कःया धापू खः । उकिया नितिं संविधानसभादुने व पिने मोर्चा नीस्वनेमाःगुलिइ दाहालं बहः नापं बियादीगु दु ।
