पंण्डित श्री हरिप्रसाद चौरासिया लाइभ फाल्गुण ४ गते
जयश्री संगीत समाजपाखें वइगु फाल्गुन ४ गते कुन्हु हलिमय् विख्यात बाँसुरी वादक पंण्डित श्री हरिप्रसाद चौरासियाया लाइभ सांगीतिक ज्याझ्वः जूगु दु । येँया प्रज्ञाभवन कमलादीइ जुइगु उगु ज्याझ्वः निगू चरणय् जूगु खँ ग्वसाः खलकं धाःगु दु ।
ज्याझ्वःया न्हापांगु चरणय् बाँसुरी वादक हरिप्रसाद चौरासिया व नेपालया वरिष्ठ तबलावादक श्री रबिनलाल श्रेष्ठं मंका कथं सांगीतिक ज्याझ्वः न्ह्यब्वइसा लिपांगु ब्वय् चौरासिया व नेपालया परम्परागत तालवाद्कत नापं जानाः सांगीतिक ज्याझ्वः न्ह्यब्वइगु खँ ग्वसा खलकं धाःगु दु ।
शास्त्रीय संगीतयात व्यवासायिक कथं न्ह्याकेत तिबः बिइगु कथं न्ह्यात्यंगु थुगु ज्याझ्वलं युवा वर्गयात आकर्षण याइगु व नेपालय् थःगु मैलिक संगीतया महत्व थुइका बिइत ग्वाहालि याइगु दाबी ग्वसा खलकं याःगु दु ।
लुमंकेबहःजू, जयश्री संगीत समाज संगीत ख्यलय् समर्पित जुयाच्वंपिं कलाकारतय्त थःगु कला न्ह्यब्वयेत छगु मञ्च बियाः सम्मान यायेगु ज्या यानाः वयाच्वंगु पुचः खः । थुगु संस्था नीस्वंगु इलंनिसें नेपाःया पारम्परीक संगीतयात अन्तराष्ट्रियकरण यायेत तःधंगु भुमिका म्हिताः वयाच्वंगु छगु स्यलागु पुचः खः ।
