सुशिल कोइराला न्हूम्ह प्रधानमन्त्री, मंगलवाः सपथ ग्रहण

संविधानसभाया दक्कले तःधंगु पार्टी नेपाली काँग्रेसया सभापति लिसें पार्टीया संसदीय दलया नेता सुशिल कोइराला देय्या न्हूम्ह प्रधानमन्त्री जूगु दु । व्यवस्थापिका संसद्या ज्याझ्वःकथं सोमवाः जूगु प्रधानमन्त्रीया चुनावय् वय्कलं दुई तिहाई मत हयाः देय्या ३७ म्ह म्ह प्रधानमन्त्री जुइत ताःलाःगु खः ।

याकःचा हे जक प्रधानमन्त्रीया उम्मेदवार जुयादीम्ह कोइरालां प्यसः व न्याकू मत हःगु खःसा विपक्षय् सच्छि व पीच्याकू मत लाःगु खः । राप्रपा नेपालं विपक्षय् मत बीगु धकाः पार्टी नायः कमल थापां संसद्यात न्हापा हे जानकारी बियातःगु खः ।

न्हूम्ह प्रधानमन्त्रीया सपथ ग्रहण मंगलवाः हे न्हिनसिया २:३० ताः इलय् जुइगु राष्ट्रपति ज्याकुथिं जानकारी ब्यूगु दु । ७४ दँ दुम्ह न्हूम्ह प्रधानमन्त्री सुशिल कोइरायात एनआरएनलिसें थीथी संस्थां बधाइ ब्यूगु दु ।

प्रधानमन्त्रीइ त्यायेधुंकाः पत्रकारतलिसें खँल्हानादिसें कोइरालां दच्छिया दुने संविधान दयेकेगु व खुलाया दुने स्थानीय चुनावयायेगु थःगु सरकारया मू खँ जुइगु धयादीगु दु ।

सुशिल कोइराला गुबले छु छु जुल ?

– २०३४ सालय् भारतया पटनाय् जूगु पार्टीया तःमुँज्याय् केन्द्रीय समितिइ मनोनित
– २०४८ सालया झापा महाधिवेसन व २०५९ स जूगु केन्द्रीय समिति पुनःगठनय् मनोनित
– २०५३ सालय् येँय् जूगु महाधिवेसनय् मध्यपश्चिमपाखें केन्द्रीय समितिइ निर्वाचित
– २०५५ असोज २० गते पार्टीया उपसभापतिइ मनोनित
– २०५६ श्रावण १० गते पार्टीया महामन्त्रीइ मनोनित
– २०५७ सालय् पोखराय् जूगु महाधिवेसनय् केन्द्रीय समितिइ निर्वाचित
– २०५७ साल जेष्ठ १७ गते महामन्त्रीइ मनोनित
– पार्टीया ११ क्वःगु महाधिवेसनय् केन्द्रीय दुजःलय् निर्वाचित लिसें उपसभापतिइ मनोनित
– २०६४ साल असोजय् जूगु निगू पार्टी एकीकरणधुंकाः कार्यवाहक सभापति
– २०६८ असोज ५ गते जूगु पार्टीया १२ क्वःगु महाधिवेसनं सभापतिइ निर्वाचित
– २०७० माघ २७ गते व्यवस्थापिका संसद्या चुनावं देय्या न्हूम्ह प्रधानमन्त्री