संविधान मदयेकुत्तले राष्ट्रपति कायम हे तयेत एमाले सहमत
नेकपा एमाले संसद्पाखें अनुमोदन याकाः वर्तमान राष्ट्रपति व उपराष्ट्रपतियात संविधान जारी मजूत्तले कायम हे तयेगु सहमत जूगु दु ।
नेपाली कांग्रेसं राष्ट्रपति व उपराष्ट्रपति संसद्पाखें राजनीतिक प्रस्तावपाखें अनुमोदन यायेगु प्रस्ताव यायेवं च्वंगु एमाले स्थायी कमिटीया बैठकं सरकारया नेतृत्वया नितिं कांग्रेसयात समर्थन यायेगु निर्णय याःगु खः ।
संविधानसभा भवन न्हू बानेश्वरय् च्वंगु स्थायी कमिटी बैठकं राष्ट्रपतियात संसद्पाखें अनुमोदन यायेगु व संविधान जारी जुइधुंकाः निर्वाचन यायेगुकथं संविधान संशोधन यायेगु निर्णय याःगु एमाले छ्याञ्जे शंकर पोखरेलं जानकारी बियादीगु खः ।
थ्वहे दथुइ एमालें न्वकु बामदेव गौतमया नेतृत्वय् सरकारय् ब्वति कायेगु निर्णय याःगु दु । गृह लगायतया महत्वपूर्ण मन्त्रालय थःत दयेमाःगु दाबी लिसे एमालें न्वकु गौतमया नेतृत्वय् सरकारय् ब्वति कायेगु निर्णय याःगु खः ।
थ्वलिसे कांग्रेस सभापति सुशिल कोईरालायात प्रधानमन्त्री जुइगु लँपु चाःगु खः ।
