खुगू बुँदे सहमतिइ कोईराला प्रधानमन्त्री जुइगु पक्का
नेपाली कांग्रेसया सभापति सुशिल कोईराला प्रधानमन्त्री जुइगु पक्का जूगु दु । एमालेया समर्थनय् व्यवस्थापिका संसद् सचिवालयसं कोईरालां प्रधानमन्त्रीया नितिं उम्मेदवारी दर्ता याकादीगु खः ।
उपसभापति रामचन्द्र पौडेलया प्रस्ताव व एमाले संसदीय दलया नेता केपी शर्मा ओलीया समर्थनय् कोईरालां संसद् सचिवालयसं उम्मेदवारी दर्ता यानादीगु खः ।
उम्मेदवारी दर्तालिपा कोईरालां लोकतान्त्रिक संविधान जारी यायेत फुक्कसित मिलय् यानाः यंकेगु धयादीगु खः ।
संसद् सचिवालयसं प्रधानमन्त्रीया नितिं उम्मेदवारी बीत थौं सनिलय् न्याताः ईतक्कया ई क्वःछ्यूगु खः । संयुक्त सरकार निर्माण बारे थौं हे एमाले व कांग्रेस दथुइ खुगू बुँदे सहमति नापं जूगु दु ।
निगू दल दथुइ दच्छियादुने संविधान जारी यायेगु, न्हापाया संविधानसभां याःगु ज्याया स्वामित्व ग्रहण यायेगु, संविधानसभां राष्ट्रपति व उपराष्ट्रपतिया अनुमोदन यायेगु, सरकार निर्माणया नितिं कांग्रेसं न्हय्न्हुदुने नीति लिसे ज्याझ्वःया खाका तयार यायेगु लिसे एमालें कोईरालायात प्रधानमन्त्रीइ समर्थन यायेगु सहमति जूगु खः ।
प्रधानमन्त्रीया नितिं कन्हय् सुथय् झिंछताः इलय् व्यवस्थापिका संसद्य् निर्वाचन जुइत्यंगु दु । प्रधानमन्त्रीइ निर्वाचित जुइत तत्काल कायम दुगु दुजः ल्याःया बहुमत हयेमा ।
