महासेनानीइ पूर्व लडाकूयात बढुवा
सरकारं नेपाली सेनाया प्रमुख सेनानी यमबहादुर अधिकारीयात महासेनानीइ बढुवा याःगु दु । मन्त्री परिषदया थौं विहिवाः च्वंगु मुँज्यां अधिकारीया बढुवा याःगु सरकारया प्रवक्ता नापं सूचना तथा संचार मन्त्री माधव प्रसाद पौडेलं जानकारी बियादीगु दु ।
बढुवा जुयादीम्ह अधिकारीया नेतृत्वय् एकीकृत नेकपा माओवादीया पुलांपिं लडाकुत नेपाली सेनाया समायोजन जूगु खः । अधिकारी थौंकन्हय् राष्ट्रिय विकास तथा सुरक्षा निर्देशनालयस ज्या यानाच्वनादीगु दु ।
अधिकारीयात सेना समायोजन सम्बन्धि सहमती कथं हे बढुवा जूगु खः । दल दथुइ समायोजनय् वंपिं पुलांपिं लडाकुत मध्ये अधिकृतया तालिम पूवंकेधुंकूम्ह मध्येपाखें छम्हेसित महासेनानी दयेकेगु सहमति जूगु खः । थ्व पुलांपिं लडाकुतसें प्राप्त याःगु मध्ये दक्कलय् तःधंगु पद खः । अथेहे निम्ह प्रमुख सेनानी, स्वीम्ह सह सेनानी व ल्यंदुपिं नीखुम्ह उपसेनानी दयेकेगु सहमति जूगु खः ।
थौंया मुँज्यां सहायक रथी रमीन्द्र क्षेत्रीयात मानार्थ उपरथीइ बढुवा याःगु दु । क्षेत्री माओवादीया आक्रमणय् लानाः घाःपाः जुयाः थौंकन्हय् ह्वील चेयरया ग्वाहालीं जुयादीम्ह सैनिक अधिकारी खः ।
