ओलिया नं प्रधानमन्त्री जुइगु आश
बहुमतीय प्रक्रिया कथं प्रधानमन्त्री ल्ययेगु ज्याझ्वःया धलः बुधवाः च्वंगु व्यवस्थापिका संसदय् पितब्यूगु दु । ज्याझ्वः धलः कथं माघ २५ व २६ गते निन्हुयंकं सुथसिया १० ताः इलंनिसें सनिलया ५ ताः ई तक संविधानसभाया दुजःपिंसं उम्मेदवारया लागिं थःगु नां दर्ता यायेमाः । थथे नां दर्ता यायेत दुजःपिं मध्ये हे छम्ह प्रस्तावक व मेम्ह छम्ह समर्थक दयेमाः । २६ गते हे सनिलय् उम्मेदवारी नां दर्ता याः पिनिगु धलः पितबीगु व २७ गते सुथय् ११ ताः इलय् संसद् भवन न्हूबानेश्वरय् च्वंनीगु मुँज्याय् सामूहिक सहलहया लागि दक्व उम्मेदवारीपिनिगु नां निर्णय यायेत न्ह्यब्वइगु व्यवस्थापिका संसद्या मूछ्याञ्जे लिसें निर्वाचन अधिकृत मनोहरप्रसाद भट्टराई जानकारी ब्यूगु खः ।
बुधवाः च्वंगु मुँज्याय् सभामुख सूर्यबहादुर थापां राष्ट्रपति डा.रामवरण यादवं वंगु २० गते अन्तरिम संविधनया धारा ३८ (२) कथं बहुमतीय सरकार दयेकेया लागि संसदयात इनापयानादीगु भ्वं ब्वनान्यकादीगु खः ।
नेकपा एमालेपाखें संसदीय दलया नेताय् त्यानादीम्ह खड्ग ओलीं थःपिं विपक्षय् नं च्वनेफु काँग्रेसं थःपिंलिसें जानां सरकार दयेकेत बांलाःगु प्रस्ताव महःसा थः हे नं प्रधानमन्त्री जुइत तयार दुगु खँ न्ह्यथनादीगु खः । प्रधानमन्त्रीया दाबेदार धाःसा दक्कले तःधंगु पार्टी नेपाली काँग्रेसया संसदीय दलया नेता सभापति सुशिल कोइराला जुयाच्वंगु दु ।
