फोहर वां छ्वःगुलिं अस्पतालयात बं पुइकीगु

सार्वजनिक थासय् फोहर वां छ्वलकि बं पुइकेगु धकाः पःखा पःखालय् च्वयातःगु जक खनीगु खःसा आः धात्थेंहे फोहर वांछ्वःगु हुनिं हे बं पुइकेत्यंगु दु ।

येँया नांजाःगु अस्पताल मोडेल अस्पतालयात फोहर वांछ्वःगुलिं हे न्ययेद्वः दां बं पुइकेत्यंगु सीदुगु दु । महानगरपालिकां फोहर वांछ्वय्त निषेध यानातःगुथाय् येँय्या १९ वडा व २१ वडाया सिमाय् लाःगु थाय् मचली अस्पतालं फोहर वांछ्वःगु प्रमाणिज जूगुलिं स्वन्हुया दुने थ्व बं पूवयेत भ्वं च्वःगु धाःगु दु । वांछ्वयातःगु फोहरया झोलाय् स्वःबलय् उकी अस्पतालया भ्वं त लूगुलिं थथे अस्पतालयात बं पुइकेगु महानगरपालिकां क्वःछ्यूगु खः ।

महानगरपालिकां सार्वजनिक थासय् फोहर वांमछ्वःसे महानगरपालिकां हे छ्वयाहइगु फोहरमुनेगु गाडिइ जक फोहर वांछ्वयेत महानगरवासिंपिं सुचं बीगु यानाच्वंगु दु ।